Nongpoh, Naitung 22
U nongñiah jong kawei ka trok kaba kit ïa u khaw jong ka FCI, u la lait salit na ka jingjia ba sngewsih hadien ba katei ka trok kaba u ñiah, kala kem ding kynsan ha ki bynta jong ka surok Umsning Bypass ha Ri Bhoi District.
Katei ka jingjia ka dei kaba la jia ha ka por kumba 5:30 eiei ha ka janmiet jong ka sngi Balang katba katei ka trok kaba don ïa u registration number AS01-FC-8674 bad kaba la ñiah da u Farijul Hoque ka dang thmu ban leit pynhap ïa u khaw FCI sha Jowai.
Katkum ka jingïoh jingtip, la kynnoh ba ka daw jong ka jingkem ding kynsan jong katei ka trok ka dei namar ka jingthut ki waiar hapoh katei ka kali. Katkum ki dur khih ba la ïoh, la ïohi ba ka ding ka la ïoh ban klang ha ki bynta ba shakhmat jong ka kali.
Na ka liang ki bor pulit pynlip ding ka thanad Umiam, tang mar ïa ïoh jingtip halor kane ka jingjia, kila wan poi mar-mar bad la lah ban pynlip noh ïa ka ding hashwa ba kan bamduh ïa ka kali baroh kawei.
