Shillong, Naitung 22
U Samla Kitkupar Nongsiej watla um shym la ïoh jingjop ha ka jingïakop rwai ha ka World Championships of Performing Arts (WCOPA) 2026 kaba la long ha Las Vegas, hynrei u la long uwei u khlur ba tyngshaiñ ka India ha kaba u la wan phai ïing da kaba ïoh ïa 3 tylli ki takma Ksiar bad 2 tylli ki takma rnong bad ka Scholarship Award.
Da kaba mihkhmat ïa ka India, u Kitkupar u la pynshoh biej ïa ki nongbishar lyngba ka sur rwai u ryndang ba syiang jong u kaba la pynlong ïa u ban khur haduh 5 tylli ki medal ha ryngkat ka khusnam na katei ka jingïakop rwai baheh ha ka pyrthei.
Kawei pat ka jingjop jong u ka dei ba u la ïoh ïa ka takma Ksiar naba u la poi ha ka Top 5 ha kane ka jingïakop rwai kaba heh ha ka pyrthei kaba don tang ki nongrwai ba tbit tam kiba wan ban ïashimbynta na ki 60 tylli ki ri jong ka pyrthei. Kane ka jingjop ka pynpaw ba u la long uwei na ki riew tbit ban rwai kiba shim bynta ha kane ka rynsan ba long mynta u snem. Ha kawei pat ka jingjop jong u ka long ba ka WCOPA ka la ai khusnam ïa u Kitkupar da ka First Place Scholarship ban ithuh ïa ka sap ba kyrpang jong u. La khmih lynti ba kane ka jingai sngewbha ïa u kan plie lad ba kham heh ïa u ba un ïoh ban shah hikai pyntbit kham shalor bad ban ïoh pynpaw pyrthei ïa ka sap ba u don.
U Samla Kitkupar, watla u khlem ïoh ïa ka nam lahduh, hynrei ka jingïoh takma bad ka jingïoh ïa ka Scholarship ka ïeng kum ka sakhi ïa ka sap ba phylla jong u. Ka jingïoh jingithuh jong u ha ka WCOPA 2026 ka la pynskhem ïa u kum uwei na ki nongrwai samla ba don jingkyrmen tam ha India bad kum ka jingai mynsiem ïa ki nongrwai ha kylleng ka Ri.
