Shillong, Naitung 22
Ki Khun ki hajar ka Hima Langrin ha ka sngi Balang ki la pynpaw ïa ka jingbitar ïa ka Executive Committee (EC) jong ka Khasi Hills Autonomous District Council (KHADC) kaba la thung Syiem biang ïa u Pa’iem Nongtei Sing Syiemiong kum u Syiem ka Hima Langrin.
Ha kane ka sngi da ki spah ngut ki paidbah ka Hima Langrin ki la wan tur puk sha ka shlem treikam ka KHADC ha ryngkat ki plakad ba thoh ïa ki jingdawa ba dei ban weng Syiem mardor ïa u Pa’iem Nongtei Sing Syiemiong bad ban pynlong da ka ilekshon ban jied ïa u Syiem ban synshar ïa ka Hima.
Haba la poi ha khyrdop ka KHADC ki bor pahara ki la khang ïa ka khyrdop jong ka Council ha kaba ki paidbah ki la pynlong da ka jingïalang hakhmat ka khyrdop bad pyrta ban plie ïa ka khyrdop, ka jingbym ïohlad ban rung shapoh ka shlem treikam ka la pynbitar ïa ki paidbah ha kaba ki la pyrshang wat ban jynrat ïa ka khyrdop khnang ban ïohlad ban ïakynduh ïa u Chief Executive Member.
Hadien katto katne por, ba ki khun ki hajar ka Hima Langrin ki la pynlong ïa ka jingïakhih ha phyllaw ka KHADC, na ka liang ka EC ka la khot ïakren ïa ki nongïalam ka Hima ban wan sha ka miej ïakren ban ïa pyrkhat ïa ki mat jingdawa jong ki.
U Convener jong ka kynhun ki Khun ki hajar ka Hima Langrin u Bah Wadladkyrpang Lyngdoh Langrin haba kren sha ki paidbah hadien ka jingïakynduh ïa ki nongïalam ka EC, u la pyntip ba ka jingïakren hapdeng ki nongïalam ki khun ki hajar ka Hima Langrin bad u CEM, EM ka KHADC kam poi shano-shano ruh namar ba ka KHADC kam lah ban ai ïa kano-kano ka rai halor ka jingdawa jong ki.
U la ong namar ba ka KHADC kam lah ban ai ïa ka rai, ki la buh por 15 sngi ba kan ai ïa ka rai bad lada kam lah ban pynhiar khet ïa u Pa’iem Nongtei, ki khun ki hajar ka Hima kin wan ban tur biang sha KHADC bad ban pynlong da ka jingïakhih shah thngan haduh ban ïoh ïa ka jingdawa, “U CEM um lah ban ai kano-kano ka rai ïa mynta da kaba ai daw ba ka rben palat ka ‘file’ bad u la pan por ban bishar bniah,” ong u Bah Wadladkyrpang.
