Jowai, Jymmang 26
Ka Dorbar Niam jong ka Seiñjrai Jowai ha ka 26 tarik Jymmang ka la pynlong ïa ka Dorbar ki Kñi bad ka Kchu ka Siang ha madan kñia pyrthat kaba don hapoh Dulong Pohhali.
Ka Dorbar niam ka dei ka tnat treikam kaba kongsan tam ha ki khun ka Niamtre kaba pynneh na ka bynta ban pyrkhat ïa ki kam niam hapoh ka Raij Jowai.
Ha kane ka Dorbar la wan shim bynta da ki Kñi na ki Phra Kur Phra Kmai kiba don hapoh ka Raij Jowai kiba don bynta hapoh ka kam niam hapoh ka Raij, ki Dolloi na kylleng ki Elaka ka Ri-lum Jaiñtia.
Ïa ka Dorbar la pyn-ïaid da u Pator Raymond Nartiang bad la ïoh ki kyntien pdiang burom na u Langdoh ka Raij Jowai, Bah S. Siangbood ha ka jingdonlang u Dolloi ka Elaka Jowai, Bah Puramon Kynjing, ki nongïalam niam, ki ‘riew rangbah, ki longkmie bad ki samla shynrang bad kynthei nalor kiwei-kiwei.
U Kñi ka Kur Paswet, Bah Shape Paswet u la kren halor ka phang “I Chwar U Pa Pyrthat wa pynskem ïa ki Kñi Phra Kur Phra Kmai”, u General Secretary Seiñraij Jowai, Bah Arwotki Sumer u la kren halor ka phang “I dor I pyrtuid Niamtre”, katba u President Seiñraij Jowai, Bah Hercules Toi u la kren halor ka phang “Ki Kñi lyngba ki chnong ki Raij wa ka ku ka Niam ka Rukom”.
U Bah Shape Paswet haba kren halor ka phang u la ïathuh ïa ka khana ka jingseng ïa ka shnong Jowai, ka jingsdang ïa ka lehniam Behdeiñkhlam bad kumno ki Kur ki ïoh bhah ïoh bynta ha ki kam niam hapoh ka Raij Jowai.
U General Secretary ka Seiñraij, Bah Arwotki Sumer haba kren halor ka phang ‘I dor I pyrtuid Niamtre’ u la ong naduh kulong kumah tang kawei hi ka jingngeit, kata ka Niamtre, hynrei hadien ka jingwan jong ki phareng hapoh ka Bri jong u Hynñiawtrep ka la don ka jingkylla niam.
“U kynrad haba u ai ïa ka niam, u phah ryngkat bad ki hukum ki adong ki ban pynïaid beit ïaid ryntih ïa ka jingim kaba man ka sngi,” la ong u Bah Sumer bad bynrap ba lyngba kine ki kyntien la sngewthuh ba ka Niamtre ka dei ka niam Tipbriew Tipblei. Kaba kordor tam ka dor bad kyrteng jong ka Niamtre ka long ba hikai ban long kiba khuid mynsiem.
Nalorkata u la ong ba ïa ka Niamtre la kha lang ryngkat bad ka jaidbynriew ha kaba jaidbynriew pat ka sdang na ka nongkha, ïa ka nongkha la tip kum ka Kur bad ïa kiba sdang ïa ka Kur la tip kum ki Blai ïung Blai sem.
Na ka kynthei mih ka Kur ka jait, na u shynrang mih u Kñi u kpa. Na ka kynthei kan kha ïa ka pateng katba u shynrang un long u nongkyrshan ka kynthei ban mih ki kha ki man.
“U shynrang um don dor lada um don ka kynthei katba ka kynthei pat kam don sap lada um don u shynrang,” la ong u Bah Sumer.
Shuh shuh u la ong ba ka Dustur ka teh ka khum ïa ka nongrah pateng kaba dei ka kynthei, nongïoh pateng ka nongpeit, ka nongsumar ka nonglum hapoh ka ïing ka sem katba u shynrang pat u long u nongïada bad halor kata ka nongrim ka Niamtre ka hikai ba ym bit ban ai jait sha u shynrang.
Katba na ka liang u President ka Seiñraij Jowai, Bah Hercules Toi u la ïathuh ïa ka kamram jong ki Kñi ban pyndep ïa ka niam ha la ki jong ki jong ki ïing, ki shnong bad ki Raij.
U la ong u Kñi u dei u shakri jong U Blei uba pyndep ïa ka niam ka rukom naduh ha ïing, ka kam kyntiew kurim, ki kam niam haba ïap bad u long ruh u Kpa ha ïing kurim.
Ha kane ka Dorbar la pynkup burom ïa ki Dolloi kynthup u Dolloi na Elaka Nangbah, Elaka Raliang, Elaka Shangpung, Elaka Mynso, Elaka Darrang, Elaka Nartiang, Elaka Nongtalang bad Elaka Nongjngi bad la pynkup burom ruh ïa ki Kñi na ki Phra Kur Phra Kmai.
