New Delhi, Jymmang 26
Kumba 7 ngut eiei ki khyllung ki la khlad noh hadien ka jingpluh ding kaba jur ha kawei ka jaka sumar khyllung ha ka thaiñ Vivek Vihar, Delhi ha ka miet Sngi Saitjaiñ, la ong ki pulit.
Baroh ki don 12 ngut ki khyllung ba dang shu kha ha kane ka jaka sumar, kiba la ïoh ban pyllait im bad la rah ïa ki sha kawei pat ka jaka sumar.
Hynriew ngut na ki, la pynbna ba ki la khlad noh ha shuwa ban poi ha jaka sumar, katba iwei na kine, i la khlad noh hynne ka step ha ka por ba dang sumar ïa i, la ong ki pulit.
Ki pulit ka Delhi ki la ujor ejahar pyrshah ïa u Naveen Kichi, u trai jong ka New Born Baby Care Hospital, hapoh ki kyndon 336 (endangering life of personal safety of others), 304A (death by negligence) bad 34 (criminal activity) jong ka IPC. Ïa mynta, utei u briew u don hapdeng ka jingphet rieh.
Kawei ka kynhun pulit ka la mih ban leit sha Jaipur, ha kaba la suba ba u Kichi u rieh tngen ha katei ka jaka.
Ha ka kyrwoh, ka ophis DCP Shahdara ka la ong, “Ha kane ka jaka sumar, ki don 12 ngut ki khyllung ba dang shu kha. La lah ban pyllait im ïa ki baroh bad la pynkynriah noh sha East Delhi Advance NICU Hospital, Vivek Vihar na bynta ka jingsumar. Na kine ki khyllung, 6 ngut na ki, la pynbna ba ki la khlad noh ha shuwa ban poi ha jaka sumar katba iwei, i la khlad ha shuwa. Ïa kine ki 7 ngut la pynkynriah noh sha GTB Hospital na bynta ka ‘Post Mortem’.”
Ha ka por kumba 11.30 baje jong ka miet Sngi Saitjaiñ, ka thanat Vivek Vihar ka la ïoh pdiang ïa ka ‘call’ haba ïadei bad ka jingkem ding jong ka New Born Baby Care Hospital, kumjuh kawei ka ïingmala kaba don marjan.
Ki heh pulit ki la mareh mar-mar sha katei ka jaka ban tohkit halor katei ka jingjia, ha kajuh ka por, ka Delhi Fire Services ka la phah ïa16 tylli ki kali pynlip ding. Ïa ka ding la lah ban pynlip noh ha ki kynta sdang jong ka Sngi U Blei.
Ym shym la don mano-mano ba khlad ne mynsaw na ka ïingmala kaba marjan (bad ka jaka sumar) kaba la kem ding lang ryngkat katei ka jaka sumar.
Na ka liang u khlieh ka Delhi Fire Services, u Atul Garg u la ong ba ka jingbthei ka ‘Oxygen Cylinder’ ka lah ban dei ka daw jong ka jingpluh ding.
Ka ophis u Myntri Rangbahduh ka ri ka la pynbna ïa ka bailutksan kaba mar T. 2 lak sha ki bahaïing ha sem jong kitei ki 7 ngut, katba T. 50,000 sha ki bahaïing jong ki khyllung kiba la mynsaw.
Kum ban shu kdew hangne, kane ka jingjia ka la jia hadien jong ka jingjia pluh ding jong kawei ka jaka ïalehkai (Gaming Zone) ha Rajkot, Gujarat bad kumba 28 ngut ki briew ba kynthup ïa 9 ngut ki khynnah ki la khlad noh.
