Nongstoiñ, Jymmang 26
Katto-katne ki shnong ha ki thaiñ jong ka Mawshynrut Civil Sub-Division, ki la mad ïa ka jingeh halor ka jingthut ba khah-khah jong ka bording namar ka jingbym shim khia jong ka tnad ba dei peit.
Ha ka kyrwoh khubor ba la phah da katto-katne ki nongshong shnong ka thaiñ Lyng-ngam, la ïathuh ba ki nongshong shnong tang ban ïoh pyndonkam ïa ka bor ding ilektrik hapoh ki shnong ki thaw, kim banse ban trei shitom ban leit pynkhuid wat ha ka Sngi U Blei ruh namar ka jingtyngkhuh jong ki dieng ki siej ïa ki sainar bording ilektrik.
Ki nongshong shnong ki la ïathuh ruh ha ka jingshisha na ka liang ka tnad ba dei peit ka la dep ban buh ïa ki kontrak ban leit pynkhuid lada jia ba ki sainar lane ka bording ka tyngkhuh ha ki dieng ki siej ha ki jaka khlaw, hynrei kaba lyngngoh ka long ba ki nongshong shnong man la u bnai ki hap ban siew ïa ka bai bording.
U Bah Pynshai K. Bani, uwei na ka nongshong shnong katei ka thaiñ u la ïathuh ba katei ka jingmih jong ki nongshong shnong ban leit pynkhuid ïa ka jingtyngkhuh jong ki dieng bad ka bording ilektrik ha ka Sngi U Blei ka la jia ha ki thaiñ Lyngngam kum ha ka shnong Pormawlai, Nong Snaram, Nong Ïawnaw bad shnong Riangtem.
U la ïathuh ruh ba katei ka jingpynkhuid ka jong ki ïa ki dieng ki siej kiba tyngkhuh ïa ka bording ka la dei namar ka jingtyngkhuh bad ki dieng ki siej, bad u la ïathuh ruh ba baroh shi katta wat la kum ki nongshong shnong ki mad ïa ka jingeh hynrei ym ju wan ki briew na ka tnad ba dei peit ban peit ïa ka khia ka shong jong ki paidbah halor ka bording ha kitei ki shnong hynrei la hap ban trei shitom hi da ki nongshong shnong la ha kino-kino ki bynta jong ka bording ilektrik.
