Nongpoh, Jymmang 26
Ar ngut ki nongshong shnong ka Ri Bhoi ki la sahkut shapoh kawei ka krem dewïong na ka jingtwa khyndew ha ki lum Patkai jong ka thaiñ mihngi ka Tinsukia distrik jong ka jylla Assam ha ka shiteng synñia jong ka 25 tarik Jymmang.
Katkum ka khubor kaba la ïohlum, la ïathuh ba kitei ki ar ngut na Ri Bhoi ki dei kiba la leit ban trei bylla tih dewïong ha kawei ka par dewïong be-aiñ kaba la tip kum ka Tikak kaba don hapdeng ka Bargolai bad Namdang jong ka thaiñ Ledo. Kane ka jaka ka don ruh ha khappud jong ka jylla Assam bad Arunachal Pradesh.
Kitei ar ngut na Ri-Bhoi kiba la don ha katei ka krem ki dei kiba la tip kyrteng kum u Bah John Nongrum na ka shnong Umsohlait bad u Bah Phingel Umbah na ka shnong Shnah Tyrkhang ha Korhadem. Kine ki shnong ki dei kiba hap hapoh ka Mawhati konstitwensi.
Kitei ki briew shnong ki la ïathuh ruh ba na ka liang jong ki bahaïing hasem jong kitei ki ar ngut kiba ngat ha katei ka apot, ki la mih na la shnong ban leit sha katei ka jaka, bad haduh ba thoh ïa kane ka khubor, ym pat lah ban pynthikna la ki dang im ne ki la khlad naba ka jingpyrshang ban sei ïa ki na katei ka krem dewïong ka dang ïaid shakhmat.
Shuh shuh ka khubor na ki pulit ka ïathuh ba la wanlam ïa ki briew na ka National Disaster Response Force (NDRF) sha katei ka jaka ba don ka krem dewïong ban pyrshang wad ïa kitei kiba la ngat ha katei ka apot.
Ha kawei pat ka liang, katkum ki khubor ba la pynmih da ki lad pathai khubor na Assam ha ka Sngi U Blei, la ong ba nalor jong kitei ar ngut na Ri-Bhoi, la don sa uwei pat uba la jah ha katei ka krem uba dei na ka Ri Nepal ïa uba la tip kyrteng kum u Dawa Sherpa.
Nalorkata, ki khubor ki ïathuh ba ki la don saw ngut ki nongtih dewïong ha katei ka krem ha ka por ba ka jingtwa khyndew ka la jia. Katba lai ngut ki dang tih dewïong na kawei ka jaka kaba khim, kumba leh ha ka jingtih dewïong thliew khnai (Rat-hole mining), uwei pat u dang lum bad kit ïa u dewïong uba ki la dep tih. Hynrei kita ki lai ngut pat ki la sahkut shapoh na ka jingtwa jong ka khyndew.
Shuh shuh katkum ki khubor, la ong ba katei ka la jia ha ka por shiteng synñia, bad la thikna ba lai ngut ki nongtih dewïong ki la sahkut shapoh krem.
Ka thaiñ Ledo-Margherita jong ka Tinsukia kaba don ha khappud jong ka Changlang distrik jong ka jylla Arunachal Pradesh, ka dei ka thaiñ kaba don ïa ki krem dewïong.
