Shillong, Jymmang 26
Ka Dr. Amena Passah kaba dei ka Professor jong ka NEHU bad myn-ta kaba dei ka President jong ka Meghalaya Women’s Alliance (MWA), kaba dei ka kynhun trei mon sngewbha kaba la seng ha u snem 1992 jong ki kynthei kiba don ka jingkitkhlieh na ka bynta ka pule ka puthi ki samla, ka jingshah lehbeiñ ki ‘riew kynthei bad ka jingpynneh ïa ka mariang, ka la ong ba ha ki 2 snem kiba la dep, ka kynhun ka sngew don ïa ka jingkitkhlieh bad ka jingsngewkhia na ka bynta ki khynnah samla kiba la kyllon ha ka jingsniew jong u drok.
Ka Dr. Passah ka la ong ba ïa kane ka jingngop jong ki samla ha u drok ym lah satia ban kynnoh ïano-ïano hynrei ki don kiba ong ba ka dei na ka daw jong ka sorkar bad ki pulit kiba la ai mynsiem ba un sa jyllei u drok hapoh ka jylla.
Ka la ong ba na ka liang ka kynhun da ka jingsngew kitkhlieh na ka bynta ki khun samla ka jylla ba kin kiar bad lait na ka jingdih ïa u drok, ki ju pynlong ïa ki prokram jingpynsngewthuh paidbah khamtam ha ki skul ban ai jinghikai ïa ki khynnah bad ki kmie ki kpa jong ki khynnah ha kaba ïadei bad ka jingsniew jong u drok.
Ka la ong ba ki khun samla kiba la kyrni ha ka jingdih drok kim dei ban pyrkhat ba ka jingim jong ki ka la kut noh hynrei lada ki don shisha ka mon ki lah ban wanphai biang sha ka jingim kaba bha, bad ka la ong ruh ba kum ka sorkar bad ki pulit kim dei ban don kata ka jingïadei bad ki nongkhaïi drok.
“Kawei ngi hap ban ong ïa ka sorkar bad ïa ki pulit ba kim dei ban don kata ka jingïadei bad kine ki nongkhaïi bad nongdih drok”, la ong ka Dr. Passah.
Ka kynhun ka la ïoh ban sdang ïa kane ka jingpynsngewthuh paidbah ha Mizo Modern School ha ki sngi kiba lah dep nangta ha Mawprem Modern Higher Secondary School ha ka 25 tarik u Jymmang. Ha ki sngi ki ban nang wan ka kynhun kan sa ïoh ban pynlong sa ha kawei pat ka skul kaba don ha Mawprem hi bad ka kynhun ka kyrmen ruh ba kan sa dang ïai pynlong ïa kum kine ki prokram ha kiba bun ki jaka bad ki skul.
“Ngi kyrmen skhem ba ngin dang ïai lah ban pynlong ïa ki prokram kiba lah ban ïarap bad pynsngewthuh ïa ki khynnah samla namar ki khynnah samla ki long ki khun ba kordor jong ki kmie ki kpa bad haba don mano-mano ha ka ïing ka sem kiba hap ha ka jingkyrni drok, ka long ka jingpait dohnud bad ka pisa bad ka ïing ka sem ruh ka la syrwa namar ba hap ban siew ïa ki bai dawai jong ki”, la ong ka Dr. Passah.
Na ka liang ka Dr Vanessa Kharmawphlang, kaba dei ka Principal ba la shongthait jong College of Teacher Education (PGT) bad kaba dei mynta ka Secretary ka MWA, ka la ong ba kane ka kynhun kan ïaleh ban pynsngewthuh ïa ki khynnah pule kham bha shaphang ka jingsniew u drok bad ba kan trei na ka bynta ka bit ka biang jong ka imlang ka sahlang.
Ka Dr. Kharmawphlang ka la ong ruh ba ka jingpynlong jong ka kynhun ïa kane ka jingpynsngewthuh halor ka jingsniew u drok ha ki skul kiba ha Mawprem ka dei namar ba kumba ka long ka shnong Mawprem ka dei ka jaka kaba la jyllei bha ha ka jingkyrni ban pyndonkam ïa u drok. Kumta ka kynhun ka la pynlong ïa kane ka prokram khnang ba yn lah ban ïoh bat bad pynsngewthuh ïa ki khynnah ha ka por ba ki dang rit.
