Shillong, Jymmang 26
Ka kynhun ki nongthoh kot Khasi ka jylla kaba la tip kum ka Khasi Authors’ Society (KAS) ha ka 25 tarik u bnai Jymmang 2024 ka la pynlong ïa ka jingïathir jingmut halor ka phang pdeng, “Ki nongthoh bad ka imlang sahlang” kiba la ïakren sani bha halor ki jingeh kiba don hapoh ka imlang ka sahlang naduh ka jingjyllei u drok, ka kyrduh kam kyrduh jam bad kiwei-kiwei ki jingeh ïa kaba la pynlong hapoh ka Arts and Culture Hall kaba don ha U Soso Tham Auditorium, Shillong.
Ha kane ka sngi la don ryngkat lang da u President ka Khasi Authors’ Society, u Dr. DRL Nonglait, u Vice President, u Dr. KD Ramsiej, ka Kong Silbi Passah ha ryngkat bad kiwei-kiwei ki nongkitkam bad ki dkhot ka seng.
Ha katei ka sngi, katei ka kynhun ki nongthoh kot ka la pdiang sngewbha bad pynithuh paidbah ruh ïa ki 16 ngut ki dkhot kiba la wan pynïasoh thymmai bad ka seng.
Ka seng ka la pynkup burom ruh ïa ka Kong Silbi Passah kaba dei ka dkhot kaba la ïoh ïa khusnam Padma Shri mynta u snem na ka President ka Ri India halor ki kam ba ka la trei.
Ka seng ka la pynkup burom ruh ïa 3 ngut ki dkhot ka seng kiba la pyndep ïa ka kyrdan PhD da ka syrnod nam kum ka jingpynkup burom bad kitei 3 ngut ki kynthup ïa u Dr. Walter Thabah, ka Dr. Doris M. Byrsat bad Dr. Banñiewkor L. Nongbri.
Hashwa ba ka seng kan pynlong ïa ka jingïapyrkhat kam hapdeng ki nongthoh, la ïoh ban pyllait paidbah ïa ka kot kaba la ai kyrteng “Kiba Nga Ñiewkor” da ka Kong Silbi Passah ba la thoh da u Babu Kitbor W. Nongrum.
