Shillong, Jymmang 26
Ka Shillong Manipuri Students’ Union (SMSU), Shillong ka la kyrpad ïa ki bor pynïaid ka National Testing Agency (NTA) ban pyllait ïa ka Common University Entrance Test (CUET) na Shillong, Meghalaya na bynta ka samoi pule 2024.
“Ka SMSU ka pynpaw ka jingsngewkhia haba ïadei bad ka lawei jong kito ki samla pule ki bym ïoh rung klas ha ki shlem ai jinghikai bapher-bapher ha Shillong, Meghalaya namar ka jingbym don ïa ka CUET – ka ‘Entrance Exam’ ha ka kyrdan jong ka ri ba la pynlong da ka NTA kaba ka Sorkar Pdeng ka la pynkongsan ba dei ban pyndep beit ïa ka naduh ka samoi pule 2024 ha ki bynta bapher-bapher jong ka ri,” la ong ka General Secretary ka SMSU, ka Yambem Suchitra Devi ha ka jingthoh ba la phah sha u Director General, NTA, Department of Higher Education, ka tnad pule-puthi ka Sorkar India, New Delhi, India.
Ka la kdew ruh ba bun bah ki kmie ki kpa lem bad ki samla pule na ki Jylla bapher-bapher ka Thaiñ Shatei Lam Mihngi bad shabar ka Shillong ki la wan shane (Shillong) da ka jingthmu ban ïoh rung klas, hynrei ka long pynban ka jingsngewsih kthang haba phai sha ka rukom pynrung klas thymmai ha ryngkat ka CUET.
Shuh shuh ka la ong ba ka jingpyntreikam kyrkieh bad jingpynlong kongsan ïa ka CUET haba ïadei bad ka jingrung klas ka la ktah ïa ka lawei jong kiba bun ki samla pule bad kiba bun kim shym la ïoh jingtip eiei halor kane ka eksamin ka ban ktah ïa ka jingrung klas jong ki.
“Ngi kyrpad ïa ki bor ba halor jong ka Sorkar Pdeng ka India ban khmih lem ïa ka mat halor ka jingrung klas bad ban leh eiei noh kloi ban ïarap ïa ki samla ba donkam jingïarap khnang ba kin ïoh rung klas – ryngkat ne khlem ka CUET bad ban ïada ïa ka jingim jong ki,” la ong ka Devi.
