Shillong, Jymmang 26
Ka shiliang jong ka jingkieng ha Umïam dam kaba dang ïaid mynta ka jingmaramot bad siang dewbilat thymmai, kan shim por kumba 21 sngi ba kan eh bad skhem ha shwa ban shah ïa ki kali ban ïaid khnang ban khang noh sa ïa kawei pat ka liang kaba dang ïaid ki kali mynta.
Ka bynta jong ka jingkieng kaba dang ïaid ka jingmaramot mynta ka kynthup ïa ka jingksam thliew ïa ka bynta ba den ïa ka pung Umïam bad ka jingsynreit dewbilat thymmai lyngba kine ki thliew kiba la ksam khnang ba ka dewbilat kan ïoh ban syrdep ruh ïa ki jingorpait kiba don shapoh jong ka dam.
Ki thliew kiba dei ban ksam khnang ban theh dewbilat thymmai sha ki bynta ba shapoh jong ka jaka ba den ïa ka pung Umïam ki don kumba 80 tylli.
Ka tyllong khubor ka ïathuh ba ka jingksam thliew kan dei tang ïa ka liang kaba den ïa ka um kaba dang ïaid ka jingmaramot mynta, tangba ïa kawei pat ka liang kaba dang ïaid ka kali mynta yn nym ksam thliew shuh, hynrei yn shu siang dewbilat thymmai ïa baroh kawei ka bynta.
Haba kylli haduh katno sngi hap ap ban skhem ka dewbilat kaba siang thymmai ïa ka bynta jong ka jingkieng khamtam haduh ban da shah ïaid kali, la ong ba ynda la dep siang dewbilat, hap ap la kumno-kumno 21 sngi ha shwa ban shah ïa ki kali ban ïaid khnang ban ïoh khang noh sa ïa kawei pat ka liang kaba dang ïaid ki kali mynta.
“Ïa kane kawei pat ka liang kaba dang shah ban ïaid ki kali, yn sa maramot da kaba shu siang dewbilat thymmai bad kan nym don shuh ka jingksam thliew ban synreit dewbilat thymmai ïa ka bynta ba shapoh ba den ïa ka dam,” la ong ka tyllong khubor.
Kumta la antad ba ka jingmaramot ïa kawei pat ka liang jong ka jingkieng kan nym da shim por than ym kumba long kawei pat ka liang kaba don shaphang jong ka um kaba hap ban ksam thliew bad theh dewbilat thymmai shaduh shapoh.
Ka kompani kaba pyntrei ka la buh por ban pyndep ïa ka jingmaramot la kumno-kumno hapoh u Jylliew, hynrei namar ka jingpynthut u slap bad ka jingdonkam ban phikir bad trei janai ïa ka kam, ka kam ka lah ban dep ha ka taïew banyngkong u Naitung.
Ka jingmaramot ïa ka dam la leh lyngba ka skhim Dam Rehabilitation Improvement Project (DRIP) kaba wan na ka Sorkar Pdeng bad ïa ka kam la pyntrei da kawei ka kompani kaba tip kum ka ITDC.
