Shillong, Jymmang 27
Ka thma jong ka Hynñiewtrep Youths’ Council (HYC) ban rat dyngkhong pyrshah ïa u drok ha kine ki sngi ka la pynlong ïa ka seng ban ïoh bat ïa kiba bun ki samla kiba la ngop ha une jingdih ba sniew khamtam kaba pynlong ïa ki khynnah kiba dangkhie dangsan ban long kum kita ki nongdie lane nongkhaïi ïa une u jait jingdih.
Ka seng ha ka jing-khynra drok ka la ïoh ban bat ïa uwei u samla uba la kynnoh ba u la ngop nyngkong ban dih drok dei lyngba na u pulit SWAT.
Une u samla u la ïathuh ba um pat ju ïohi ïa u drok bad um nang hi ruh kumno ban pyndonkam, hynrei u la ïathuh ba uta u pulit SWAT u ju hikai ïa u bad ïa u paralok jong u kumno ban dih ïa u drok.
Shuh shuh utei u samla u la ïathuh ba utei u pulit SWAT dang nyngkong ki sngi u ju ai ei ïa u drok la kumba san sien eiei bad u ju wanrah ïa u drok ban dih ha ka kamra jong u.
Katkum ka jingïathuh jong utei u samla, u la ong ruh ba utei u pulit SWAT u dei uba la rangbah bad u la ïathuh ba na ka liang jong u um pat ju pynngop drok satia ïano-ïano ruh.
