Shillong, Jymmang 27
Ka Hynñiewtrep Youths’ Council (HYC), Sengkmie ha ka Lah Sngi U Blei ka la leit ban ïakynduh ïa ka DGP ka Jylla, Kong Idashisha Nongrang ban pynsngew halor ka jingkynrei jong u drok uba la saphriang ym tang ha sor Shillong hynrei ha kiwei-kiwei ki bynta jong ka Jylla.
“Ngi la buh hakhmat jong ka ïa 3 tylli ki bynta haba ïadei bad kumno ban ïakhun ïa u drok. Ka jingïakhun kam dei tang jong ka HYC bad lada ngi kwah ban rat dyngkhong ïa u drok uba la poi ha man la ki thliew ïing, ngi donkam ïa ka jingïatreilang jong baroh – ki Dorbar Shnong, ki kynhun seng, khamtam ka tnad pulit,” la ong u President ka HYC, Bah Roy Kupar Synrem haba kren sha ki lad pathai khubor.
U la ong ba ka seng ka la ai jingmut ïa ka DGP ba ka tnad pulit ka hap ban trei dukhi ban pyntikna ba u drok uba wan poi na kiwei pat ki Jylla bad ki ri un ym ïoh rung ha Shillong bad ka Jylla.
Haba kdew ba ka East Jaiñtia Hills bad ka Ri-Bhoi ki long ki 2 tylli ki lynti ïaid kiba u drok u ïaid lyngba ka Jylla, u Bah Synrem u la ong ba ka seng ka la jingai jingmut ïa ka tnad pulit ban tehlakam ïa ka jingrung u drok sha ka Jylla da kaba ïatreilang bad kiwei ki tnad treikam jong ka Sorkar Jylla bad Sorkar India ban pyntikna ba u drok uba dei ban poi ha Shillong ne ka Jylla um dei ban poi satia.
“Na ka liang ka DGP ka la pyntikna ïa ngi ba ka tnad pulit kan trei borbah khnang ba ka jingwan poi u drok sha ka Jylla kan long kaba jynjar haduh katta-katta bad ba ki briew kiba don bynta ha kane ka kam kin shem jingeh. Ngi khmih lynti ba hapoh ka jingïalam ka Kong Nongrang, kane ka jingwan poi jong u drok sha ka Jylla un dkut ne duna,” u la ong.
Halor ka jingshah pyllait noh ki nongdie drok ynda la poi ha ïingbishar, utei u nongïalam u la ong, “Balei ki shah pyllait, namarba bunsien ka jingtohkit ka bakla lane kam ïaid katkum ki kyndon aiñ NDPS. Ka mut ki ïingbishar ki pyllait ïa u nongshah kynnoh ne nongshah kem halor ka ‘technical ground’. Ym tang ha kane ka Jylla, hynrei ha kiwei ki Jylla ka ri ka long kumta hi.”
Haba ïadei bad kane ka bynta, u la ong ba ka seng ka la ai jingmut ba ka tnad pulit ka dei ban don da ka kynhun kaba kyrpang ka ban khmih beit thik tang ïa ki mukotduma NDPS ka ban kynthup ïa ki ophisar ka tnad pulit kiba tip bha ïa ki kyndon jong ka NDPS.
U Bah Synrem u la ong ba kane kan myntoi shi kat dei khnang ba lada kem ïa ki nongdie drok, ynda la poi ha ïingbishar, ki nongsaid aiñ (jong ki) kin ym ïoh daw ban kdew kti ba don ki jingbakla kiba ki leh ha ka por jong ka jingtohkit.
“Ka DGP ka la ïathuh ba ka tnad ka dang ïaid shakhmat bad ka kam kumno ban shna ïa ka kynhun tohkit ka ban peit beit thik tang ïa ki mukotduma NDPS,” u la ong.
Shuh shuh u President u la bynrap ba ka seng ka la ai jingmut ïa ka tnad pulit ba kan pynsaphriang jingtip sha ki paidbah ba kim dei ban thied ïa ki tiar ba wanrah da kino-kino u briew khamtam da ki nongdie drok kiba tuh na la ki ïing ki sem.
Kum ban shu kdew hangne, ka seng ha kine ki khyndiat bnai ka la mih shakhmat ban ïakhun pyrshah ïa ka jingjyllei jong ki nongdie bad nongdih drok khamtam hapoh Shillong bad kiwei-kiwei ki bynta jong ka Jylla.
