Shillong, Jymmang 27
U Symbud Myntri Rangbah ka jylla ba khmih ïa ka tnat Kam Pohïing (Police) Bah Prestone Tynsong u la kyntu ïa ki seng bad kiwei ban ym shim ïa ka aiñ ha kti ïoh ka wanrah ïa ka jingbym sngewthuh jingmut hadien habud.
Ha kaba ïadei bad ka jingleit pynpra jong ka HYC ïa ki ïing ha Lum Survey, u Symbud Myntri Rangbah u la ong ba ka HYC ka la pynlong ïa ka jingleit pynpra ïa ki ïing khlem da ïasyllok bad ki bor pynïaid District kaba lam sha ka jingpynkheiñ ïa ki aiñ.
Haba kren sha ki lad pathai khubor ha ka Lah Sngi U Blei, u Bah Prestone u la ong ba ka Sorkar kam shym la ïohthiah halor kane ka mat bad ka kam ban pynshisha ïa ki briew kiba sah ha Lum Survey ka la ïaid shakhmat bad ka aiñ kan sa leh hi ïa kaba donkam lada lap ba ki dei kiba shong beaiñ.
“Ka sorkar kan nym ai jaka sah ïa ki briew ba shna ïing beaiñ bad ba ka don ka aiñ bad ki jingteh kyndon ruh ki don. Ngi na ka liang jong ka Sorkar ruh ngim kyrshan satia ban ai jaka sah ïa ki. Lada ki dei kiba shong beaiñ, ka aiñ hi kan sa leh ïa kaba donkam,” la ong u Bah Prestone.
“Ngim shym la ïohthiah satia halor kane ka mat bad mynta ka jingtrei ka dang ïaid shakhmat ban pynshisha ba ki briew kiba sah ha Lum Survey ki dei ki nong India lane kim dei, ïa kaba ïa mynta yn nym pat lah ban ong eiei namar ka jingpynshisha ka dang ïaid shakhmat,” u la ong.
Shuh shuh u Bah Prestone u la ong, ka Sorkar kan ap bad peit shwa ïa kaei ka ban mih bad don na ka jingshong bishar ïa kane ka kam lashai ka sngi, bad hadien kata yn sa ïohi ïa ki lad ki lynti ban sa shim ym tang da ka Sorkar Jylla hynrei ka Sorkar Pdeng ruh hapoh ka jingïalam u Defence Estate Officer.
Ha kajuh ka por, u Symbud Myntri Rangbah u la pyntip ba u la dep ban bthah ïa u DC ka East Khasi Hills ba un khot biang ïa ka jingïalang jong baroh ki kynhun namar kane ka jaka ka dei jong ka Defence Estate Office, Guwahati bad hap hapoh ka jaka jong ka Contonment Board.
