Nongstoiñ, Jymmang:
Ka la long shisha ka khubor kaba sngewtynnad ïa ki kmie kpa bad khamtam ïa ka skul hi baroh kawei ba ka skul Nongstoiñ Public Secondary School na West Khasi Hills sa shisien ha kane ka kynti ka la tyngshaiñ biang ha ka risol Secondary School Leaving Certificate (SSLC) ne ka risol matrik hadien ba ka samla Witnessy Wahlang ka la wan ha ka kyrdan 13 na ka thup jong ka ‘Top-20’.
Kane ka burom bad ka nam lyngba kane ka risol jong ka jingïoh ban rung jong katei ka samla pule na katei ka skul ha ka thup ‘Top-20’, ka la pynkmen ïa ki kmie ki kpa, ki nonghikai jong katei ka skul.
Ka samla Witnessy Wahlang haba ïakren sha ki lad pathai khubor ka la pynpaw ïa ka jingsngewnguh nyngkong ïa U Blei, ïa ki kmie ki kpa bad kumjuh ïa ki nonghikai kiba la don ryngkat bad ka haduh ba kan da poi shaduh katei ka kyrdan ban ïoh rung ha ka thup jong ka ‘Top-20’.
“Nyngkong eh ka dei hi ka bor ka jong U Blei, hynrei tang na lade ngam lah,” la ong ka samla Witnessy.
Shuh shuh ka la ong, “Ngam da buh than kita ki kynta ban khreh kot hynrei ha man ba nga lait por nga khreh kot bad ynda nga la dep ban ïarap kam ïa i Mei, nga khreh kot bad nga khreh ruh haduh ba ngan da sngewthuh.”
Ka samla Witnessy ka la ong ruh ba kam da mutdur than ban ïoh ïa katei ka kyrdan namar lada ym ïoh kan sngewsih hynrei kaba nyngkong eh ka dei ruh ka jingai mynsiem jong i Mei i Pa, ki nonghikai kaba ki ju pynsngew ruh ïa ka ktien ka jong U Balei kaba ong, “Ka jingtieng ïa U Blei ka long ka jingsdang jong ka jingstad” bad kiba ju ai mynsiem ba ka dei ban shaniah ha U Blei namar dei U Blei uba ai bor bad ym ha ka jinglah ka jong lajong.
“Kaba nyngkong hi, lada ngim phai khmat sha U Blei, ha nga shimet ka long lehnoh ei,” ka la ong.
