Shillong, Jymmang 27
U Symbud Myntri Rangbah ka Jylla, Bah Prestone Tynsong u la ong ba kum ki paidbah kim dei ban don ka jingsngew syier ne jingtieng ha kine ki sngi ba dang khyrwit ka ‘erlangthari ‘Remal’ naba na ka liang ka Sorkar ka la dep ban shim ki lad ki lynti bad pynkhreh ban shimkhia halor kino-kino ki jingjia kiba mih.
Haba kren sha ki lad pathai khubor hadien ba la wai ka jingïalang khmih bniah halor ka jinglong-jingman, u Bah Prestone u la ong, ka sorkar ka la shim ïa ki lad ki lynti ban pynthikna ba kan don ka jingshngaiñ ïa ki nongshong shnong ka jylla na ka jingkhyrwit ka ‘erlangthari bad ther u ‘lapbah ‘lapsan na ka jingkhie ka ‘erlangthari ‘Remal’.
U Symbud Myntri Rangbah u la ong, “Ngi la long kiba la pynkhreh bha, la ka long ha ka liang ka pisa tyngka ne ha ka bor met, la ka long ha kano-kano ka dur ruh, ngi la long kiba la pynkhreh. Ngi la dep ban ai ka jingbthah ïa baroh ki kynhun, la ka dei ki bor ka sorkar, ki seng trei mon sngewbha ne kino-kino kiba donbynta lang ha ka kam haduh ki shnong ki thaw, ba kin ai ïa ka jingïatreilang bad ki bor sorkar.”
Shuh shuh u Symbud Myntri Rangbah u la pyntip ruh ba u la dep ban bthah ïa ki Deputy Commissioner (DC) hapoh ka jylla ba katba dang khyrwit ka ‘erlangthari ryngkat ka jingther u ‘lapbah ‘lapsan, ba kim dei ban thiah hynrei ban trei baroh 24 kynta na ka bynta ka jingshngaiñ jong ki nongshong shnong bad kyntu ruh ïa ki nongshong shnong ba kim dei ban don ka jingsheptieng.
“Ha ki katto katne ki district, lah ban long kiba don jingma bad ngi la dep ban ai ka jingbthah ïa ki bor pynïaid district ba ki dei ban long kiba peitngor bad ba kin trei bha ïa ki kam ki jam jong ki,” la ong u Bah Prestone.
Haba kylli halor ka jingbym biang ki nala pyntuid um kaba wanrah ïa ka jingshlei um, u Bah Prestone u la ong, “Ngi la donkam ban don ïa ka jingïatreilang hapdeng ka tnat Pynroi Sor, Municipal bad ka tnat PWD Roads, Ngi dang ïasyllok bad ngin sa shim ïa ki lad ki lynti kiba kongsan”.
U Bah Prestone u la pyntip ruh ba ka sorkar ka la dep mang T.20 klur na ka bynta kawei-pa-kawei ka district ban pynbiang mardor ïa ki jingdonkam na ka bynta kito ki lanot kiba shah ktah ha ka bor mariang.
Ha kaba ïadei bad ka jingdon jingma jong ki dieng kiba la tlor kiba lah ban khyllem noh, u Bah Prestone u la ong, ba ka tnat Forest ka don ïa ka jingkitkhlieh ban ithuh ïa kita ki dieng.
“Haba phi kren shaphang ka jylla Meghalaya ki don bun ki khlaw kiba hap hapoh ka jingkhmih jong ki Syiem, Raid bad kumta halor kane ka bynta ruh ngi donkam ban ïatai sani bad baroh kiba don bynta lang bad ban ithuh khnang ba yn lah ban pynkhyllem noh ïa ki dieng kiba la don jingma kiba ki lah ban khyllem hi noh,” u la ong.
