Nongpoh, Jymmang 27
Ha kawei ka jingjia tyngkhuh kali ha Ri Bhoi District kaba la jia ha ka Sngi U Blei, uwei u nongñiah jong ka kali Bolero Pick-up u la khlad noh hajuh hadien ba kali kaba u la ñiah pynher sted bha, ka la leit ban kynthih sha shiliang jong ka surok bah National Highway 6 bad kylla khongpong.
Katkum ka tyllong khubor, la ïathuh ba ki pulit ka thanat Umsning ki la ïoh jingtip halor kane ka jingjia ha ka por kumba 10:30 mynstep ha kaba katei ka kali Bolero Pick-up kaba don ïa u nombor ML05-AB-3102 kaba la ñiah da u Bah Stanphan Ryntathiang (21 snem) na ka shnong Patharlyndan, Eastern West Khasi Hills District katba ka dang hiar na Shillong sha ki thaiñ Nongpoh, ynda poi ha ki surok khongwaiñ mar ïa lait ka shnong Umran, ka la leit ban kynthih sha shiliang jong ka surok bah National Highway 6 kat haduh ba kan kylla khongpong syndon bad leit ban tynrah pat sa ïa kawei ka kali Maruti Swift Desire kaba don ïa u registration number AS25-DC-9118 kaba dang kiew sha nongbah Shillong.
Ha kane ka jingjia, u nongñiah ka Bolero Pick-up, u la khlad noh hajuh katba ar ngut kiwei pat kiba don lang ha katei ka kali ba la tip kyrteng kum u Bah Breaksius Mawlong na ka shnong Mawkriah bad u Bah Kamwadathmu Hadem na ka shnong Krongshnong, West Jaiñtia Hills ki la mynsaw malu-mala bad la pynkit noh sha ki jaka ai jingsumar.
Shuh shuh la ïoh jingtip ruh ba saw ngut kiwei kiba shong ha ka kali kamai Maruti Swift Desire, kiba kynthup ïa uwei u khyllung rit 3 snem ka rta, u Mahesh Balmiki (34), ka Deepa Das Balmiki (28) bad ka Minoti Das (46) ki la mynsaw jur ha kane ka jingjia bad la pynkit noh ïa ki sha ka jaka ai jingsumar ha nongbah Guwahati.
Ïa ka met kaba sah jong u Bah Stanphan Ryntathiang la pynkit noh sha Nongpoh Civil Hospital na ka bynta ban pyndep ïa ka post mortem, hynrei na ka liang ki bahaïing ki la kyrpad ban pyllait ïa kane ka bynta sha u majistor naba kim don ka jingtharai sniew halor kane ka jingjia, bad na ka liang u majistor ruh u la pdiang ïa katei ka jingkyrpad ki bahaïing.
Hadien ba la pyndep ïa ki jingdonkam katkum ki kyndon aiñ, la aiti noh ïa ka met jong u Bah Stanphan Ryntathiang sha ki bahaïing na ka bynta ba kin pyndep ïa ka jinglehniam khatduh.
