Shillong, Jymmang 27
Ki nongïalam ka Hynñiewtrep Youths’ Council (HYC) ki la shah khot hajir ha ki pulit halor ka jingleit kyndang bad pynpra ïa ki ïing ha Lum Survey.
Katkum ka byrta ba la phah sha ki nongïalam ka HYC, la hukum ïa ki ba ki dei ban leit mih hakhmat u Investigation Officer ha thanat Sadar ha ka 28 tarik mynta u bnai ha ka por 1 baje mynsngi.
Kane ka jingshah khot hajir ka la long hadien ba ki pulit ki la pynrung mukotduma pyrshah ïa u President ka HYC Bah Roykupar Synrem, Vice President Bah Donboklang Kharlyngdoh bad u Assistant General Secretary Bah Isaac Basaiawmoit ha ka 23 tarik Jymmang.
Ha kane ka byrta ba la phah sha ki nongïalam la ong, “Ha ka por ba tohkit ïa ka ejahar, ba la pynrung ha thanat Shillong Sadar, la paw ba ki don ki daw ban kylli ïa phi ha ka ban pynthikna ïa ki jingshisha bad ki jingjia na phi haba ïadei bad ka jingtohkit. Kumta la bthah ban wan mih ha katei ka sngi bad ka por ba la buh ha thanat Sadar. La ong ruh ba lada ym kohnguh ïa kane ka jingbthah, ki pulit ki lah ban kem hapoh ka kyndon 41 A(3) bad (4) jong ka CrPC.”
