Nongpoh, Jymmang 27
Uwei u samla na ka jylla Assam u la duh noh ïa la ka jingim na ka jingngam jyllop ha ka por ba u la leit jngi pyngngad ïalade na ka jingjur jong ka jingshit ha ka Wah Umtrew kaba don ha Byrnihat, Ri Bhoi District.
Katkum ka jingtip ba la ïoh lum, la ïathuh ba kane ka la jia ha ka por kumba 5 haduh 6 baje janmiet ha kaba utei u samla uba la tip kyrteng kum u Ranjit Das na ka shnong Japorigog, Assam, u la leit kai sha katei ka wah lem bad la ki paralok ban leit jngi pyngngad na ka jingjur palat jong ka jingshit.
La ïoh jingtip ruh ba ha ka por ba utei u samla lem bad ki paralok ki dang ïa jngi, ka la don ka jingkiew um kynsan jong ka wah Umtrew. Kumta na ka liang kitei ki paralok ki jong u ki la ïoh ban mih noh na katei ka wah, katba ma u pat, um shym la lah ban poi shuh sha ryngkew bad ngam jyllop syndon ha katei ka wah.
Tang mar ïa ïoh jingtip halor kane ka jingjia, ki pulit ka Byrnihat Outpost lem bad ki pulit ka Special Rescue Team ki la hiar sha katei ka jaka ban pyrshang sei ïa ka met jong utei u samla, hynrei namar ka jingdum jong ka miet, ïa ka kam la hap pynsangeh noh bad bteng pat ha ka step Lah Sngi U Blei, ha kaba la ïoh noh ban sei ïa ka met jong utei u samla na katei ka wah ha ka por kumba 11 baje mynstep.
Ïa ka met kaba sah jong utei u samla hadien ba la sei na ka wah Umtrew la pynkit noh sha Nongpoh Civil Hospital ban pyndep ïa ka postmortem bad ka jingtohkit ban lap ïa ka daw tynrai jong ka jingkhlad utei u samla, ka dang ïaid shakhmat.
