Shillong, Jymmang 27
Ka Sorkar Jylla lyngba ki Deputy Commissioner ka la pynbna shuti ïa ki skul ha ka Sngi Ba-ar namar ka jingbteng ban hap u slap bajur ha kylleng ki jaka hadien ba la ïaid lynti ka ‘erïong ‘Remal’ ha ki bynta jong ka Bangladesh bad West Bengal.
Ka jingpynbna ban ïoh shuti ki skul ha ka Sngi Ba-ar (28 tarik Jymmang) ka dei kaba la pynbna lyngba ki Deputy Commissioner kiba kynthup ha East Khasi Hills district, West Khasi Hills district, Ri-Bhoi district, West Garo Hills district bad kiwei kiwei.
Katkum ka jingpynbna kaba la pynmih da ki Deputy Commissioner la ong ba kane ka jingai shuti ha ka Sngi Ba-ar ka long ban lait na kano-kano ka jingjia namar ka jingjur palat u slap kaba la sakhi ha ka Lah Sngi U Blei.
Ka jingjur slap ha Meghalaya ka la jia hadien ba ka ‘erïong Remal ka la lynshop ïa ki bynta jong ka ri Bangladesh bad kumjuh ïa ki bynta jong ka Jylla West Bengal khamtam ki jaka kiba don ha khappud duriaw Bay of Bengal.
Kane ka jingjur slap ka la sdang naduh ka step jong ka Lah Sngi U Blei hadien ba ka ‘erïong ‘Remal’ ka la hiar ryngkew bad ïaid lynti lyngba ki khap duriaw ha Bangladesh bad lyngba ka duriaw Bay of Bengal ha kaba ka la ktah lang ruh ïa ka West Bengal bad ka jingjur slap ka la jia ruh ha Meghalaya, Tripura bad Assam kiba don mar khap bad ka ri Bangladesh.
