Nongpoh, Jymmang 27
Ki nongïalam shnong ryngkat bad baroh ki paidbah nongshong shnong jong ka Erpakon ha ka Lah Sngi U Blei ki la rai da kawei ka sur ban nym leit mih shuh sha ka jingïakren ïasuk ba la pynbeit da ka shlem treikam u Deputy Commissioner ka Ri Bhoi.
Ïa kane ka rai la shim ha ka jingïalang kaba la pynlong hapoh ka shnong ha kane ka sngi.
Haba kren sha ki lad pathai khubor, u General Secretary ka shnong Erpakon, u Bah Lambor Kharshilot u la ïathuh ba hadien ba na ka liang ki nongïalam shnong ki la dep ban leit mih sha ka jingïalang pynïasuk hapdeng ka shnong bad u trai jong ka dukan bam RN Sharma Hotel ha ki sngi kiba la dep, hynrei na ka liang ki bor pynïaid district kim shym la ai ïa kano-kano ka rai ïa ki mat dawa jong ka shnong.
U Bah Lambor u la ong ruh ba kumta hadien ka jingshah khot biang ban leit sha kaba kum katei ka juh ka jingïalang kaba la thmu ban pynlong ha kane ka sngi, ki nongïalam shnong ha ryngkat bad baroh ki paidbah ki la pynlong shwa ïa ka jingïalang hapoh ka shnong ha kane ka step ban shim ïa ka rai halor katei ka jingkhot ki bor pynïaid district ka Ri Bhoi.
Ha kane ka jingïalang, u Bah Lambor u la ïathuh ba ki nongshong shnong hi baroh jong ka Erpakon ki la shim da kawei ka rai rangbah ban nym leit shuh sha katei ka jingïalang ïakren ïasuk, namar na ka liang ki paidbah hi haba don lang utei u RN Sharma, uba dei trai ka dukan bam RN Sharma Hotel, uba ju wanrah ïa ki nongtrei bar jylla pathar hapoh ka shnong ba kynthup ruh ïa uwei na kiba donkti ban pynïap dusmon ïa u Bah Kyrmen Lyngdoh Nonglait. Kumta kum ki paidbah kim don jingsuk shuh hapoh ka shnong ka thaw bad kan bha shibun ba un leit noh sha jaka kaba u wan khnang ka shongsuk-shongsaiñ kan wan biang hapoh ka shnong ka thaw.
Shuh shuh u Bah Lambor u la ïathuh ba utei u RN Sharma u la shu plie beaiñ ïa katei ka dukan bam ruh hapoh ka shnong, da kaba pyntip ba ka jingai jingbit (No Objection Certificate), ka jong u ka la kut naduh u snem 2016, hynrei u dang plie beaiñ beit ïa ka dukan kat haduh kine ki khyndiat sngi ba jia ka jingshah pynïap jong u Bah Kyrmen Lyngdoh Nonglait. Kumta halor kane la rai, ka Dorbar Pyllun jong ka shnong Erpakon da ka jingburom ka pyntip sha ka shlem treikam u Deputy Commissioner ka Ri Bhoi ba kan nym lah shuh ban ïashim bynta ha katei ka jingkhot ïakren ïasuk ka jong ki, da kaba ong ruh ba ki bor district ki dei ban shimkhia na ka bynta ka ïing ka sem jong u Bah Kyrmen Lyngdoh Nonglait kaba mad ïa ka jingjia ba sngewsih, ym ban shimkhia ïa ki aiñ kiba la pynjari da ka shnong ïa u nongpynïap briew.
