Nongpoh, Jymmang 27
Uwei u briew uba la suba donkti ban pynïap ïa uwei u rangbah na ka shnong Umtasor, u la khlad noh ha kti ki pulit ha shwa ban poi sha ka jaka sumar ha MIMHANS kaba don ha nongbah Shillong.
Ïa kane la pyntip da u Superintendent of Police (SP) ka Ri Bhoi District, u Jagpal Singh Dhanoa ha ka kyrwoh khubor ba la pyllait ha ka Lah Sngi U Blei, ba utei u briew uba la suba donkti ban pynïap ïa u Bah Amison Muruh na ka shnong Umtasor ha ka miet jong ka 23 tarik mynta u bnai, u la khlad noh ha shwa ban poi sha ka jaka sumar jong ka MIMHANS.
Utei u rangbah uba la khlad noh la tip kyrteng kum u Phurly Suting (52 snem) bad u dei ba shong ba sah ha ka shnong Umtasor. Une u briew u la shah kem noh ha ki pulit ka Nongpoh halor ka jingsuba donkti ban pynïap ïa u Bah Amison Muruh da kaba pom da ki kynja tiar kiba nep na ki bynta shadien jong u ryndang kat haduh ba un da khlad syndon ha shen.
U SP u la pyntip ruh ba ïa utei u rangbah uba ki pulit ki la ïoh jingbit ban pynlong ïa ka jingtohkit kaba lai sngi lynter na ka District Court jong ka Ri Bhoi, ha ka 25 tarik mynta u bnai, u la sdang ban kem pang bad pynpaw ïa ka jingbym biang ha ka bor pyrkhat pyrdaiñ. Na ka liang ki pulit ki la rah noh ïa u mar-mar sha Nongpoh Civil Hospital na ka bynta ban pynlong ïa ka jingkhmih ïa ka koit ka khiah jong utei u rangbah bad hadien kata la phah noh ban rah sha MIMHANS, Shillong ha kaba la pynbna ba u la dep ban khlad lypa ha shwa ba un poi ha katei ka jaka ai jingsumar.
Halor kane ka jingjia, ïa ka met kaba sah jong utei u rangbah la pynkit noh sha ka jaka buh metïap jong ka Civil Hospital Shillong ban pyndep ïa ki jingdonkam katkum ki kyndon jong ka aiñ bad ruh ban leh ïa ka postmortem. U SP ka Ri Bhoi u la pyntip ruh ba la pynrung mukotduma halor kane ka jingkhlad jong utei u rangbah ha thanat Umïam ha ka 26 tarik u Jymmang, 2024.
