Kolkata, Jymmang 27 (UNI)
Ar ngut ki kynthei napdeng ki hynriew ngut ki briew ki la khlad noh hadien jong ka ‘erlangthari ha West Bengal, ha kaba ka ‘Remal’ ha ryngkat ka jingsted kaba 150 kmph ka la ieh noh shadien ïa ka jingjulor ha ki distrik ba marjan, ka jingkhyllem ki dieng bad ki ‘post’ ding ilektrik bad pynthut ruh ïa ka bording naba ka jingïai bteng ka jinghap slap ka la ïalam sha ka jingshlei um ha ki bynta bapher-bapher jong kane ka sor, kaba la ktah shi kat dei ïa ka jingim ba man ka sngi, la ong ki tyllong khubor.
Napdeng kitei kiba la khlad noh, saw ngut na ki, ki la khlad namar ka jingshah bat bording, uwei ha Panihati, kawei ha Maheshtala bad ar ngut ha Memari, la ong ki tyllong khubor.
Uwei u briew u la khlad hadien ba ka bynta jong ka dewbilat na kawei ka ïing rim ka la hap halor jong u ha Entally, Central Kolkata katba kawei ka kynthei ha Mousumi Island ha 24 South Parganas ka la khlad noh hadien ba u dieng u la khyllem halor jong ka hadien jong ka ‘erlangthari.
Ki shi-kpa shi-khun ki la khlad noh ha Memari ha Purba Bardhaman hadien ba ki la shah bat bording na u sainar katba ki dang pynkhuid ïa ki dieng ‘lakait ha lynti ïaid jong ki. Ka Myntri Rangbah ka Jylla, ka Mamata Banerjee ka la bthah ïa u Chief Secretary ka Jylla ban phah kaiphod sha ka halor ki jingjulor bad hukum ïa ki lad jingïarap ba mardor sha ki jaka ba shah ktah.
Ka Mamata ha ka Sngi Ba-ar kan sa leit jurip ïa ki jaka ba la julor lyngba ka ‘Helicopter’ ban khmih bniah ïa ka jinglong-jingman.
Ki jaka jong ka Sundarbans ki la kham shah ktah ha kaba bun ki ïing khyndew ki la shah rong noh bad ka jingkhyllem ki ‘post’ ding ilektrik – kaba la ïalam sha ka jingshong dum bad ka jingkyrduh um ban dih.
Ki wah ba la shlei ki la pynjulor ruh ïa baroh ki jaka rep ha South 24 Parganas.
Ka khubor na ka IMD ka ong ba ka ‘erlangthari ‘Remal’ ha ki rud duriaw Bangladesh bad ki marjan jong ki rud duriaw ka West Bengal ka la ïaid sha ka phang Shatei, ha ka jingsted kaba 08 kmph ha ki 6 kynta ba la dep bad long pdeng ha ka por 1130 kynta IST mynta ka sngi, 27 tarik Jymmang, 2024 ha Bangladesh bad ki jaka marjan ka West Bengal, hajan u ‘latitude’ 23.0°N bad ‘longitude’ 89.2°E kumba 65 km ka phang Shatei Lam Sepngi ka Mongal (Bangladesh), 100 km ka phang Shatei-Shatei Lam Mihngi ka Canning (West Bengal), 110 km Shatei Lam Mihngi ka Kolkata (West Bengal), 150 km Shatei Lam Sepngi ka Khepupara (Bangladesh) bad 150 km Shathie Lam Sepngi ka Dhaka (Bangladesh).
Kane ka jinglong-jingman ka lah ban ïaid sha ka phang Shatei-Shatei Lam Mihngi, bad kan sa tlot sha ka ‘Deep Depression’ ha ka janmiet mynta ka sngi, 27 tarik.
Hynrei, ka ophis ba khmih ïa ka jingkylla suiñ bneng ha Alipore ka la batai lypa shaphang u slap ha ki distrik rud wah ba marjan jong ka phang Shathie bad Shatei jong ka 24 Parganas, Howrah, Hooghly Purba bad Pachim Medinipur, Murshidabad, Nadia ha kine ki 24 kynta ban wan ha ryngkat ka jingjur lyer kaba 40 kmph.
Ka ophis ka la pynbna ruh ïa ka ‘Orange Alert’ na bynta jong baroh ki distrik ka phang Shatei jong ka Bengal lashai ka sngi.
