Jowai, Jymmang:
Saw ngut ki khynnah skul na Ri-lum Jaiñtia ki la paw ha ka risol Meghalaya Board of School Education (MBOSE) jong ka eksamin SSLC bad ka HSSLC-Arts kaba la pynbna ha ka 24 tarik Jymmang.
Ar ngut kiba la rung ha ka thup ‘Top-20’ ki kynthup ïa u Dauniwan Sajem uba la wan ha ka kyrdan 10 da kaba ïoh ‘distinction’ ha ka sobjek E, M, S&T, SSc, HPE, Kh bad ïoh 556 ‘mark’ na Shangpung Presbyterian Higher Secondary School, Shangpung.
Kawei pat ka dei ka Hakiru Challam na ka skul St. Mary Mazzarello Girls’ Higher Secondary School kaba la wan ha ka kyrdan 16 da kaba ïoh ‘distinction’ ha ka sobjek E, M, S&T, SSc, HPE, Kh bad ïoh 548 ‘mark’.
Ar ngut kiwei pat ki dei na ka HSSLC-Arts ba kynthup ïa u Fredrique Gweneth Ryngkhlem uba la wan ha ka kyrdan 7 da kaba ïoh ‘distinction’ ha ka sobjek E, K, Ed, Geo, Sg bad ïoh 426 ‘mark’ na North Liberty Higher Secondary School, Mookyrdup, Jowai.
Ka Monkynjailin Syngkon ka la wan ha ka kyrdan 10 da kaba ïoh ‘distinction’ ha ka sobjek Ae, Ps, Ed, Ec bad ïoh 422 ‘mark’ na St. Dominic’s Higher Secondary School, Mowkyndeng, West Jaiñtia Hills District.
U Dauniwan Sajem u dei u khun jong ka Kong Delyma Sajem bad Bah Complease S. Passah na ka shnong Shangpung katba ka Hakiru Challam ka dei ka khun jong ka Kong Risaintre Challam bad Bah Biwell Khlem na Chilliangraij, Jowai.
U Fredrique Gweneth Ryngkhlem u dei u khun jong ka Kong Lucy Ryngkhlem bad Bah Hamehiwan Dkhar na Lumpariat, katba ka Monkynjailin Syngkon ka dei ka khun jong ka Kong Rihundeimon Syngkon bad u (L) Daplin Sutnga na Mookyndeng.
Haba ïoh lad ban ïakren bad ki lai ngut ki khynnah, nyngkong ki la pynpaw ka jingkmen kaba khraw ryngkat ka jingainguh ïa U Blei ba dei lyngba ka jingdon ryngkat jong u ba ki la poi sha kane ka thong. Ki la pynpaw ruh ka jingsngewkmen ka bakhraw ba dei hadien ka jingtrei shitom jong ki, la ïoh ban pynmih ïa u soh uba thiang.Baroh kine ki khynnah ki la aikhublei kaba kyrpang ïa ki nonghikai, ki kmie ki kpa bad ki bahaïing hasem kiba don borabor ha syndah ha kane ka jingïakhun ka jong ki.
U Fredrique Gweneth Ryngkhlem u la ong ba um shym la poi pyrkhat ban poi shaduh kane kyrdan namar um shym la pynkhreh bha ha kane ka eksam hynrei u la ai mynsiem pat ïa kiwei ki para khynnah ban pynleit jingmut haba pule kot wat la ka dei shi kynta ne arkynta namar ïalade ruh u pynkhreh ïa ka eksam da kaba pynleit jingmut haba pule kot bad shah skhor ïa ki jingbatai jong ki nonghikai.
Ha kaba ïadei bad jingkot sha kane ka thong, ka Monkynjailin Syngkon ka la ong ba kam shong tang ha ka jingminot hynrei hap ruh ban shim bynta ha kiwei ki jait kam kiba lah ban tei ïa ka bor met bad bor jabieng.
Ka la iathuh ruh ba hadien ba kala pyndep ïa ka Class X ka la jied ban pule da ka ‘Science’ bad ka la pyndep ruh ïa ka klas XI, hynrei hadien ba ka sngewthuh ba kan ym lah ban leh bha, kumta ka la ran dien noh bad jied ban ïakhun ïa ka Class XII da ka ‘Arts’ Stream bad poi shaduh kane ka thong.
U Principal ka North Liberty Higher Secondary School, Bah Richard B. Uriah u la ong naduh ba sdang ïa ka Arts Stream hapoh NLHSS, ka risol ka long 100 na ka 100, bad u pynpaw ka jingkmen ba ha une u snem U Blei u la jubab ïa ka jingtrei shitom jong ki khynnah, ki nonghikai, ki kmie ki kpa bad u Fredrique Gweneth Ryngkhlem uba la rung ha ka thup ‘Top-10’, HSSLC.
Ym tang kata u la pynpaw ruh ka jingkmen ba ha une u snem, na ki 59 ngut ki khynnah kiba ïakhun ïa ka eksam HSSLC, 33 ngut ki la wan ha ka kyrdan 1st Division bad 19 ngut ki 2nd Division nalor ba ki ïoh ‘Distinction’ ha ki sobjek bapher-bapher.
Wat la ka NLHSS kam lah ban rung ha ka thup ‘Top-20’ hynrei ki khynnah ki la leh bha shibun ha kaba la don 122 ngut ki khynnah kiba ïakhun ïa kane ka eksamin, 67 ngut dei kiba poi ha ka kyrdan 1st Division.
U la ïathuh ba ha ka por ba ïakhun ïa ka ‘Selection’, la don 30 ngut ki khynnah kiba ‘fail’ ha ki lai-saw tylli ki sobjek hynrei kaba pynkmen pat ka long ba na kitei ki 30 ngut, 21 ngut ki la pass bha bad 9 ngut pat ki khlem poi sha ka thong.
Ka Sister Theresa Phawa ka la pynpaw ka jingkmen namar hadien 9 snem ka Hakiru Challam ka la wanrah burom ïa ka St. Mary Mazzarello Girls’ Higher Secondary School.
