Shillong, Jymmang 27
Ka jingwad ïa ki lai ngut ki nongbylla tih dewïong, kynthup ïa ar ngut kiba na Ri-Bhoi, kiba la sahkut shapoh kawei ka krem dewïong ha Tinsukia, Assam, ka la bteng ha ka Lah Sngi U Blei, hynrei ym pat lap satia haduh mynta.
Katkum ki khubor, ka jingwad ïa kitei ki lai ngut ka la sdang ha ka Sngi U Blei bad ka bteng mynta ka sngi.
Lah ban kdew ba kawei ka krem dewïong kaba don ha Tikok West ha Ledo, hapdeng ka Bargolai bad Namdang, ka la julor hadien ba ka la don ka jingtwa khyndew ha ka por kumba 12:30 mynsngi jong ka Sngi U Blei. Kane ka jaka ka don ha ka thaiñ Patkai Hills ha khappud jong ka Assam bad Arunachal Pradesh.
Kitei ki lai ngut kiba la sahkut shapoh ka krem dewïong ki long u Bah John Nongrum na ka shnong Umsohlait bad u Bah Phingel Umbah na ka shnong Shnah Tyrkhang ha Korhadem. Kine ki shnong ki dei kiba hap hapoh ka Mawhati konstitwensi. Sa uwei pat uba la don lang bad kitei ar ngut u dei na ka Ri Nepal ïa uba la tip kyrteng kum u Dawa Sherpa.
Nalorkata, ki khubor ki ïathuh ba ki la don saw ngut ki nongtih dewïong ha katei ka krem ha ka por ba ka jingtwa khyndew ka la jia. Katba lai ngut ki dang tih dewïong na kawei ka jaka kaba khim, kumba leh ha ka jingtih dewïong thliew khnai (Rat-hole mining), uwei pat u dang lum bad kit ïa u dewïong uba ki la dep tih. Hynrei kita ki lai ngut pat ki la sahkut shapoh na ka jingtwa jong ka khyndew.
Shuh shuh katkum ki khubor, la ong ba katei ka la jia ha ka por shiteng synñia, bad la thikna ba lai ngut ki nongtih dewïong ki la sahkut shapoh krem.
Haba ïoh ban ïakren bad u pyrsa jong u Bah John Nongrum lyngba ka ‘Phone’ mynta ka sngi, u la ïathuh ba ma u lem bad kiwei pat ki bahaïing hasem ki la wanphai noh na Tinsukia mynta ka sngi hi. Ki bahaïing hasem jong u Bah John Nongrum bad u Bah Phingel Umbah ki la leit sha Tinsukia hynnin ka sngi ryngkat bad ki pulit.
“Mynne mynstep ngi la leit ban ïakynduh ïa ki pulit jong ka Tinsukia, bad ki la ïathuh ba ka jingwad kan dang lah ban shim por sa katto katne sngi. Namarkata, ngi la wanphai shwa sha la shnong,” la ong utei u bahaïing hasem jong u Bah John Nongrum.
Shuh shuh u la ïathuh ba ka jingïoh jingtip halor katei ka jingjia ka dei lyngba jong utei u nongtih dewïong uba la don shabar jong ka krem uba dang lum ïa u dewïong uba kitei ki lai ngut ki la ïoh ban tih.
“Ngi la ïoh jingtip halor katei ka jingjia na uwei na ki nongbylla tih dewïong uba la don lang ha katei ka por bad u dei uba na Nepal,” la ïathuh utei u bahaïing jong u Bah John Nongrum.
Haduh ba thoh ïa kane ka khubor, ym pat ïoh jingtip satia la kitei ki lai ngut ki dang im ne ki la khlad namar ki nongwad kim pat lah satia ban poi sha ka jaka ba don kitei ki nongtih dewïong.
