Shillong, Jymmang 28
Ka Anti-Narcotics Task Force (ANTF), East Jaiñtia Hills ryngkat ka jingïatreilang bad ki pulit ka thanat Lumshnong, dang step phyrngab ki la ïoh ban kurup ïa u drok heroin na kawei ka bos Night Super.
Ha ka step phyrngab jong ka Sngi Ba-ar ha ka por kumba 1.30 eiei, ka ANTF na EJH bad ki pulit ka Lumshnong ki la ïoh ban bat ïa katei ka bos kaba don ïa u nombor AS01-FC-8299. Haba la talasi la ïoh ban kurup haduh 42 tylli ki synduk sabon ba la thep ïa u drok Heroin bad la ïoh ruh ban kem noh ïa u briew ba wanrah ïa utei u drok.
Une u drok ba la ïoh kurup na utei u briew uba la tip kyrteng kum u Abdul Kuddus Laskar uba dei u khun jong u Nur Islam Laskar na Cachar, Assam, u don ka jingkhia haduh 458 gram.
Ha kaba ïadei bad kane, ki pulit ki la kurup noh ïa ka ‘mobile phone’ jong u Abdul Kuddus Laskar bad ki la pynngat ïa u hapoh ki kyndon jong ka NDPS Act bad ka jingtohkit mynta ka dang ïaid shakhmat.
