Shillong, Jymmang 28
U MLA barim ka Mawlai, Bah PT Sawkmie u la ong ba donbok ba khlem jia eiei ïa ki khynnah skul jong ka Grace Academy naba ka sorkar ka la dep pynbna ban ai shuti namar ka jingjur u slap kaba la bteng ha ka Sngi Ba-ar ka 28 tarik Jymmang.
U Bah Sawkmie u la ong ba kane ka jingkhyllem ka kynroh kaba hap ha Mawkynroh Umshing ka surok by pass na Mawïong sha Mawlai Mawtawar ka la jia ha ka Sngi Ba-ar ha ka por 4 baje mynstep ha kaba ki nongbylla ïing briew kiba sah sha sharum ki la mynsaw namar ka jingban ka khyndew.
U la ong aïu kan jia ïa ki khynnah skul kiba don harum kane ka kynroh lada plie ïa ka Grace Academy kaba don ha Mawkynroh Umshing namar ka surok haduh mynta ka la don ki dak orpait ha kaba la ker da ki siej shiliang ka surok ban nym shah ïaid kali.
U la ïathuh ba un sa kren ïa u Secretary ka tnat PWD ban pynskhem ïa ki kynroh ha shilynter ka surok khnang ban nym buh jingma.
U la kyntu ruh ïa u Block Development Officer (BDO) ba un phah noh ïa ka kaiphot sha u Deputy Commissioner ka East Khasi Hills District khnang ban ai jingïarap kyrkieh ïa kito ki nongbylla kiba shah ban ha ka khyndew.
U Bah Sawkmie u la batai ba ka jingkhyllem kane ka kynroh ka dei namar mynshwa kane ka jaka ka dei ka khyndew ba la shuh theh ha ka por ba tih ïa ka surok Mawlai Bypass.
U la ainguh ïa u Blei namar kane ka jingkhyllem ka kynroh ka jia ha ka por mynstep bad ka por bym long skul, hynrei lada jia ha ka por long skul kan pynsyier mynsiem ïa ki kmie ki kpa.
U la kitbok ïa kito kiba shah ban ha ka khyndew ba kin shait kin khlaiñ noh.
Katba u Bah Charlie Rani uwei na kiba sah ha katei ka shnong u la kyntu ïa ka tnat PWD ba kan shna skhem ïa ki kynroi shi linter kane ka surok ban shngaiñ ka leit ka wan ki paidbah khamtam kane ka surok kaba la orpait mar shiteng.
