Shillong, Jymmang 28
Ka khubor na ki pulit ha ka Sngi Ba-ar ka ïathuh ba uwei u nongshong shnong u la ujor ba ha ka 24 tarik Jymmang ha ka por kumba 1:30 mynsngi, u la ïoh ïa kawei ka song (Parcel) na GPO, Shillong, bad ha kane ka song, la don da u Kynja (Ganja) kaba u la khlem pan ne thied.
Ha kawei pat ka jingjia, ki pulit ki la ong ba u Alandonald Suiam u la ujor ba ha ka 25 tarik Jymmang, ki runar ki la tuh ïa ka thuk-thuk jong u (ML-04C-7284) na GS Road, Khyndailad.
Shuh shuh ki pulit ki la ong ba u Durgesh Tiwari u la ujor ba ha ka 25 tarik Jymmang, ki runar ki la tuh ïa ka pla jong u na ka ïing basa kaba don ha Lower Jail Road, Shillong.
Nalorkata, ki pulit ki la pyntip ba u Nital Das u la ujor ba ki runar ki la leit rung sha ka jaka buh mar kaba don ha Jail Road, Shillong bad ki la tuh ïa ki sopti jong ki kynthei kiba shongdor kumba T. 80,000.
Na ka liang ki pulit ki la ïoh ïa ka jingujor na u Mawsawmziaki ba ha ka miet jong ka 23 tarik Jymmang, ki runar ki la tuh ïa ka thuk-thuk jong u (MZ-04A-8488) na Madanrting Block-F, Shillong.
Ha ka 26 tarik Jymmang, ki pulit ki la pyntip ba uwei u nongshong shnong ïa uba la tip kyrteng kum u Jopstar Kharkongor, 31 snem ka rta, u la shah shoh shah dat ha ki runar ha Baniuñ, East Khasi Hills, bad la hap ban pynkit ïa u sha Civil Hospital, Shillong ban ai jingsumar namar ka jingmynsaw.
