Nongpoh, Jymmang 28
Ha Ri Bhoi District, ka ‘erïong ‘Remal’ kam da ktah than kumba la jia ha kiwei pat ki district jong ka jylla, lait noh tang ka jingkhyllem jong ki siej ki dieng ha ka surok bah National Highway 6 marjan bad ka shnong Umling bad ka jingshlei um ha kylleng ki jaka jong ka Ri Bhoi na ka daw jong ka jingjur slap.
Kaba kham shah ktah ka dei tang ha Jirang konstitwensi, ha kaba ka la don katto katne ka jingshah ktah kaba kynthup ïa ka jingïap jong kawei ka muid na ka jingkhyllem jong u dieng ha ka sem ha ka shnong Mawskeithem bad ka jingkhyllem jong ki dieng kwai ha katei kajuh ka shnong lem bad kiwei ki shnong ba kynthup ïa ka Umsohbar, Mawskeilum.
Shuh shuh la ïoh jingtip ruh ba katto katne tylli ki ïing ki la julor malu-mala na ka jingban jong ki dieng kwai ha ka shnong Umkynsier, ka jingjulor jong ka kamra shet (kitchen) ha ka shnong Warmawsaw bad jingjulor jong kawei ka ïing ha ka shnong Umtang na ka jingkhyllem jong u dieng kwai bad ka ‘lakait.
Ka jingshlei um pat kaba la wan jia ha kiba bun ki bynta jong ka dong Ri-Bhoi ka dei namar ka jingbym biang jong ki nala um, kaba la khang lynti ïa ka um bad pynlong ba kan rung bad ïaid kat shaba lap hadien ka jingther jong u ‘lapbah ‘lapsan.
