Khliehriat/Jowai, Jymmang 28
Ka jingwan lynshop ka ‘erïong ‘Remal’ ryngkat u ‘lapbah bajur ka la wanrah ka jingduh noh ïa kawei ka mynsiem briew nalor ka jingjulor na ka jingtwa khyndew ha ki surok, ka jingtwa jong ki kynroh, ka jingshlei um bad ka jinghap ki dieng ha rilum Jaiñtia.
Haba phai sha East Jaiñtia, uwei u briew ïa uba la tip kyrteng kum u Ohi Nongtdu ba dang 27 snem ka rta, u la duh noh ïa la ka jingim na ka jingshah tep ha ka khyndew naba twa ka kynroh ha ïing sah ka jong u.
Kane ka la jia ha dong Weilong ha Sutnga kaba hap hapoh ka Wapung C&RD Block ha East Jaiñtia Hills District. Kane ka ïing kaba la julor na ka jingtwa ka kynroh ka dei jong ka Kong Rati Nongtdu.
Ka khubor kaba ïohlum ka la ïathuh ba ka jingtwa ka kynroh ka la jia ha ka por kumba 5 baje eiei mynstep jong ka 28 tarik Jymmang.
Mar mar na ka liang ka bor District jong ka East Jaiñtia lyngba ka ADC ka Kong JU Kharpuri bad u BDO ki la leit sha katei ka longïing bad aiti ruh ïa ka song ïarap pisa kaba 4 lak tyngka.
Shuh shuh ka la don ruh ka jingtuid ka khyndew kaba la tap ïa ka surok bah National Highway 6 hakhmat ka Sonapur Tunnel bad ka la wanrah ïa ka jingsahkut ka ïaid ka ïeng jong ki kali. Na ka liang ka National Highway Authority of India ryngkat ki pulit ki la lah ban pynkhuid noh ïa ka khyndew kaba la twa bad tuid hapdeng surok.
Katba ha West Jaiñtia Hills District pat la sakhi ïa ka jingshlei jong ka Wah Myntdu, bad ruh ka jinghap jong ki dieng kaba la ban ïa kawei ka ïing ha shnong Khimusniang kaba dei trai da ka Kong P Bareh.
Na ka liang ka Civil Defence & Home Guards, Jowai ha ka jingïalam u Sub-Inspector F Lamare ki la pom lyngkhot-lyngkhai bad lah ban pynkhuid noh ïa kine ki dieng.
