Shillong, Jymmang 28
U President ka Hynñiew-trep Youths’ Council (HYC), Bah Roy Kupar Synrem u la ong ba ki briew kiba don bynta ha ka ban pynïaid ïew ïa u drok ki ju pyrshang katba lah ban pynngat ïa ki dkhot ka seng ha ki kyndon aiñ bapher-bapher namar ki tip shai ba ka kam khaïi drok ka kynthup ïa bun bah ka pisa.
“Ngi tip bha ba kine baroh ki mih namarba ka seng ka shim ïa ka sienjam ban rat dyngkhong khamtam ïa u drok. Kumba baroh ngi tip, ka pisa haba ïadei bad ka jingkhaïi bad ka jingpynïaid ïew ïa u drok ka bun bha bad ngi sngewthuh ruh ba kita ki briew lada ki sngewthuh ba don ka jingwit lehse ha ka jingpynïaid ïew ïa u drok, kin shim ïa ki lad ki lynti kiba bun jait ba kumno ban pynshitom bad pynngat ïa ngi ha ki kyndon bapher-bapher,” la ong u Bah Synrem haba kren sha ki lad pathai khubor ha ka Sngi Ba-ar.
Une u nongïalam u la shah khot hajir ha ki pulit ka Thanat Sadar hadien ba la shah pynngat mukotduma halor ka jingleit kyndang bad pynpra ïa ki ïing ha Lum Survey, Shillong ha ka 23 tarik mynta u bnai.
“Ïa ka mukotduma pyrshah ïa ngi, la ai hi da ka tnad pulit bad la pynngat ha kiba bun ki kyndon jong ka IPC kumjuh ka MMPO haba ïadei bad kato ka sngi ha kaba ka seng ka la leit ban rung ha ka 23 tarik mynta u bnai ha Lum Survey,” la ong u Bah Synrem.
Haba kdew ba ka seng ka kloi ban wan shakhmat ban ïashim bynta ha ka jingtohkit, u la ong ba lada pynngat mukotduma pyrshah ïa ki dkhot ka HYC bad lada ka mukotduma ka poi sha ïingbishar hadien ba ki pulit ki la pyndep la ka kamram, ki dkhot ka seng kin ïashim bynta ha kane ka liang.
“Ngim don eiei ban kren pyrshah ïa ka tnad pulit ne ïano-ïano. Hynrei kumba ka long, na ka liang ka seng ha ryngkat ki paidbah, ngi la ïohi ïa ka jinglong-jingman jong kato ka jaka ha ka 23 tarik, ha kawei ka liang kaba la pynlong pat ïa kiba bun kiba don hangto ban shim bad leh ïa kaei kaba dei ban leh,” u la ong.
Haba ban jur ïa ka nongrim kum ki nongïalam, kata ban ïada bad pynneh-pynsah ïa ka jaidbynriew, u Bah Synrem u la ong ba kine ki jingpynngat mukotduma bad jingpynngat kyndon, ki dei ki jingïaid lynti kum ki nongïalam kaba ki hap ban mad.
“Ngi khmih lynti bad ngi sngewthuh ruh ba haba ngi leh na bynta ban ïada ïa la ka ri bad ka jaidbynriew, ngi ngeit ba ki paidbah ka jaidbynriew hynñiewtrep ki don ha syndah jong ngi bad lada ki paidbah ki don ha syndah bad ngi, ngim tieng bad ngim rieh na kiba kum kine ki jingpynngat kyndon bapher-bapher,” u la ong.
Shuh shuh u la bynrap ba ka seng kan ap ïa kaei kaba mih na ïingbishar namarba ka don ka mukotduma hapoh District Court ha kaba ka jingtian bishar ka long mynta ka sngi.
Na ka liang u President u la ïathuh ba ki don sa 2 ngut ki nongïalam ka seng, kita u Vice-President bad u Secretary kiba la shah khot hajir lang haba ïadei bad kane kajuh ka jingjia.
