Shillong, Jymmang 28
Ka JCCRP kaba kynthup ïa saw tylli ki seng na rilum Jaiñtia, kita ka JSU, JYF, JSM bad ka JNC ki la buh ka jingkyrpad sha ki nongshong shnong ka rilum Jaiñtia ba kin phah ïa ka jingpynsngew ka jong ki halor ka State Reservation Policy 1972 sha ka JCCRP.
Ha ka kyrwoh khubor ba la pyllait da u General Secretary ka JSU u samla TR Suchen u la ong, kane ka jingpan ïa ki jingpynsngew na ki paid nongshong shnong ka rilum Jaiñtia halor ka Reservation Policy ka long ba kum ka JCCRP kan ïoh ban phah kawei ka jingmut sha ka Expert Committee kaba ïai khmih biang ïa ka State Reservation Policy 1972.
U samla TR Suchen u la ong ba ka JCCRP jong ki saw tylli ki seng ka la dep ban pynlong ïa ka jingïalang ha ka Sngi Nyngkong ha Jowai ban ïa pyrkhat halor ka jingpan kaiphod ka Sorkar lyngba ka Expert Committee kaba ïai khmih biang ïa ka State Reservation Policy.
Kumta u la ong halor kane ka jingpan kaiphod ka Sorkar, ka JCCRP ka kyrpad ïa ki nongshong shnong ka rilum Jaiñtia ba kin sngewbha ban thoh lang sha ka JCCRP shuwa ba kin phah sha ka Expert Committee namar lada pynmih shibun tylli ki jingpynsngew ka lah ban wanrah pynban ïa ka jingkulmar bad ka jingbym ïa sngewthuh lang ïa ka jingdawa.
Ka JCCRP ka la pynpaw ba lada don mano-mano kiba kwah ban thoh lane ban pynsngew shaphang ka jingkwah ban pynkylla ïa ka State Reservation Policy 1972, ba kin sngewbha ban phah lem ka jingthoh sha ka JCCRP da kaba phah lyngba kine ki Whatsapp number (7005806661, 7005264971, 6009914196) hapoh ka 10 tarik u bnai Jylliew shuwa ban phah sha ka Expert Committee ha shuwa jong ka 15 tarik u bnai Jylliew.
