Shillong, Jymmang 28
Ka jingwad ïa ki lai ngut ki nongtih dewïong ba kynthup ïa ar ngut na Meghalaya ha Tinsukia, Assam, ka la bteng biang ha ka Sngi Ba-ar, bad ym pat lap satia haduh mynta.
Katkum ki khubor na Assam, la ong ba ki bor distrik jong ka Tinsukia ki la pyndonkam da ki pulit, NDRF, bad SDRF ban wad ïa kitei ki lai ngut ki nongbylla tih dewïong kiba la sahkut shapoh ka krem hadien ba ka la don ka jingtwa khyndew.
Na ka liang ki bor ba dei khmih ki la ïathuh ba la pyndonkam ruh da ki puh shilum ban khat ïa ka khyndew kaba la kah ïa katei ka krem dewïong.
Kitei ki lai ngut kiba la sahkut shapoh ka krem dewïong ki long u Bah John Nongrum na ka shnong Umsohlait bad u Bah Phingel Umbah na ka shnong Shnah Tyrkhang ha Korhadem. Kine ki shnong ki dei kiba hap hapoh ka Mawhati konstitwensi. Sa uwei pat uba la don lang bad kine ar ngut u dei na ka Ri Nepal ïa uba la tip kyrteng kum u Dawa Sherpa.
Lah ban kdew ba kawei ka krem dewïong kaba don ha Tikok West ha Ledo, hapdeng ka Bargolai bad Namdang, ka la julor hadien ba ka la don ka jingtwa khyndew ha ka por kumba 12:30 mynstep jong ka Sngi U Blei. Kane ka jaka ka don ha ka thaiñ Patkai Hills ha khappud jong ka Assam bad Arunachal Pradesh.
Nalorkata, ki khubor ki ïathuh ba ki la don saw ngut ki nongtih dewïong ha katei ka krem ha ka por ba ka jingtwa khyndew ka la jia. Katba lai ngut ki dang tih dewïong na kawei ka jaka kaba khim, kumba leh ha ka jingtih dewïong thliew khnai (Rat-hole mining), uwei pat u dang lum bad kit ïa u dewïong uba ki la dep tuh. Hynrei kita ki lai ngut pat ki la sahkut shapoh na ka jingtwa jong ka khyndew.
Dei une u nongbylla tih dewïong uba don shabar jong ka krem bad uba la lait na ka jingmynsaw uba la pyntip sha kiwei pat kynthup ïa ki bahaïing hasem jong kitei ar ngut ki nongbylla na Ri-Bhoi.
Ki bahaïing hasem jong u Bah John Nongrum bad u Bah Phingel Umbah ki la leit sha Tinsukia ha ka Sngi U Blei, hynrei ki la wanphai noh ha ka Lah Sngi U Blei na ka daw ba ka jingwad ïa kine ar ngut kan dang kham shim por.
