Nongstoiñ, Jymmang 28
Ka HITO Mawshynrut Circle ka la lap ba ka jingpyntrei bad siang rong ïa ka surok ha ka shnong Mawkhar kawei na ki shnong kaba hap hapoh ka Mawshynrut Civil Sub Division, ka la long kaba trei torti haduh katta-katta.
Ki nongïalam ka HITO ki la pynpaw ba ïa katei ka jingtrei torti ïa ka surok, ka seng ka la lap hadien ba ka la pynlong ïa ka jingleit jurip ha ryngkat bad ki nongïalam shnong Mawkhar ha kaba la lap ba u kontraktor u la shu leh tang dep bad la shu leh torti haduh katta-katta haduh ba ki bynta ba la dep ban siang rong, la lap ba ka rong ka shu shong khaw rew bad pra tang shu pynkhih da ka kti.
La ong ba ka HITO ka la lap ruh ba ki don ki bynta ha kaba dang shu dep ban siang mawsolin da u kontraktor, uba la ïaid shakhmat ban siang sa ka khyndew khlem pat da ïuh ne tylliat ïa ki mawsolin da ka roller.
Ki nongïalam ka HITO ki la ong ba kane ka rukom trei u kontraktor ka la long ba u shu leh beiñ ïa ki paidbah. Kumta ka HITO ka maham ba dei ban pynsangeh noh shwa ïa ka jingpyntrei ïa katei ka surok bad ka dawa ruh na ka tnat PWD ba kan shimkhia bad ban leh eiei ïa u kontraktor.
