Shillong, Jymmang 28
Hadien ba u Returning Officer ka Shillong Parliamentary Consti-tuency u la pynjari ïa ka kyndon 144 CrPC ha ka sngi ñiew ‘vote’ ban khang bad nym shah satia ïa ki paidbah ban mih bad ban ïalehkmen ha ka sngi ñiew ‘vote’ MP ka ban sa long ha ka 4 tarik u Jylliew 2024, na ka liang ka Hynñiewtrep Integrated Territorial Organisation (HITO) Sengkmie ha ka Sngi Ba-ar ka la leit ban buh da ka dorkhas hakhmat u Returning Officer bad uba dei ruh u Deputy Commissioner ka East Khasi Hills District, u SC Sadhu ban pynpaw ïa ka jingpyrshah halor kane ka hukum.
Haba kren sha ki lad pathai khubor hadien ka jingwan buh ïa ka dorkhas, u President ka seng, Bah Donbok Dkhar u la ong ba kane ka jingpynjari jong u DC ïa ka 144 CrPC ka long kaei-kaei ka bym lah satia ban pdiang namar ka don ka jingïatyngkhuh bad ka kyndon kaba 14 bad ka kyndon kaba 19 ha kaba ha ka kyndon kaba 19 ka la kren shai ba katkum ka riti synshar jong ka Ri India, ki paidbah ki don ïa ka hok ban jied ïa kano-kano ka seng saiñ pyrthei bad ban pynpaw ïa ka jingkyrshan jong ki sha kino-kino kyrtong ba ki mon.
“Ngi ngeit skhem ruh ba ka jingpynjari ïa ka 144 CrPC ka pyni shai ba hangne hapoh jylla jong ngi, la ïohi kumba ka bor jong ki briew ka tlot bha haduh ba hap ban da pynjari da kane ka 144 CrPC. Ngi sngewkhia na kata ka daw ngi wan shakhmat ban pynsngew halor kane”, la ong u Bah Donbok.
U Bah Donbok u la ong ba kaei ka hukum kaba u DC u la pynmih u dei ban pynbeit noh mardor. Na liang ka seng ka la kyntu ruh ïa u DC ba u dei ban weng noh ïa katei ka hukum namar wat ka ïingkashari ruh ka la ong ba ïa ka 144 CrPC ym dei ban pyndonkam bakla kum ka atiar ban shu pynjari kulmar.
Shuh shuh u Bah Donbok u la ong ruh ba kajuh ka ophis treikam kaba ju ong ïa ki paidbah ba kin mih shakhmat ban thep ‘vote’ ryntih hynrei ka dei kajuh hi pat ka ophis treikam kaba khanglad ïa ki paidbah ban mih bad ban ïaleh sngewbha ha ka sngi ñiew ‘vote’.
“Haba mynta phi la ong ba ban mih bad thep ‘vote’ hynrei balei pat phi khang ba ngin ïa mih ban ïalehkmen bad shad? Kane ka dei ka hok jong u paidbah bad manla uwei pa uwei u nongshong shnong jong ka Ri India, u don ïa ka hok ban lehkmen namar kat ïa uta u MP ban leit mihkhmat ïa ka jylla jong ngi, hato ngim dei mo ban kmen? Hato phin shu khanglad nadong-shadong?”, la bynrap u Bah Donbok.
U Bah Donbok u la ong ruh ba kane ka long ka jingtynjuh ïa ka Bri u Hynñiewtrep namar ki paidbah ki long kiba thiah lyngngai bad kat kaba pynjari da ki kyndon kiba kumno-kumno ruh hynrei ki paidbah ki la shu hun bad sngap jar bad kiba bun ki ju heh nia tang lyngba ki jingthoh na ki rynsan ‘social media’ katba da dei ka por ban mih shakhmat pat kim nud.
“Ngi kyntu ïa ki paidbah ba kin kyndit thiah noh namar lada ki ïai sngap kin don sa da kiwei-kiwei ki aiñ kiba yn sa pynjari bad ha kata ka por yn leh shuh kumno”, la ong u Bah Donbok.
Haba kylli la hato ka pynjari jong ka sorkar ïa ka hukum ban khanglad ïa ki paidbah ban mih ha ka sngi ñiew ‘vote’ ka dei namar ba ka tieng ïoh ki seng saiñ pyrthei kiba don ha ka bor kim poi sha ka thong ka jingjop, u Bah Donbok u la ong ba lada jop ka National People’s Party (NPP) ne ka Voice of the People Party (VPP) ne ka Congress ne kano-kano ka seng saiñ pyrthei ruh, hynrei kum ki paidbah ki don ïa ka hok ban ïashad bad ïaleh kmen namar ki ïoh ïa u nongmihkhmat u ban mihkhmat ïa ka jylla.
