Shillong, Jymmang 28
Saw ngut ki briew ki la mynsaw namar ka jingtwa kaba la jia ha Mawlai Mawkynroh harud ka Mawlai Bypass ha ka step Sngi Ba-ar.
Kiba mynsaw ki kynthup ïa ki nongbylla kiba tip kyrteng kum u Klumar Thongni (23 snem) na Myriaw, Pynhunlang Nongsiej (28 snem) na Mawranglang SWKH, Sukki Rymbai (28 snem) na Mawranglang bad Daplu Kular Lyngdoh Rngaiñ (18 snem).
Kane ka jingtwa ka jia ruh marjan bad kawei ka ïing kaba la tei bun mala ha ka jaka kaba long sharing.
La sakhi ba katto-katne tylli ki ïing kiba don sha them, ki la shahktah namar kane ka jingtwa.
Ïa ka bynta jong ka surok Mawlai Bypass kaba la don jingma namar kane ka jingtwa, la buh dak noh kum ka jingmaham ïa ki kali khnang ba kan ym buh jingma ïa ki kali kiba ïaid lyngba kane ka surok.
Ka jingtwa ha kane ka jaka ka la jia hadien ka jingbteng ban hap u slap uba jur hadien ka jinglynshop ka ‘erïong Remal ha Bangladesh kaba la pynlong ban jur slap ha kiba bun ki Jylla ka thaiñ Shatei Lam Mihngi kynthup ha Meghalaya. Ka jinghap slap ka la bteng naduh ka step 27 tarik bad ka dang bteng haduh mynta ka sngi ka 28 tarik.
Katkum ka jingïathuh u Superintendent of Police ka East Khasi Hills, ïa kiba mynsaw ha kane ka jingjia la pynkit noh sha ka jaka sumar ha North Eastern Indira Gandhi Regional Institute of Health and Medical Sciences (NEIGRIHMS).
