Mairang, Jymmang 28
U Deputy Commissioner (DC) ka West Khasi Hills bad u DC ka Eastern West Khasi Hills ki la pynmih ïa ka jingpyntip paidbah ba kan don ka jingphylliew jingmut, jingai jingmut, ki jingpynsngew ha kaba ïadei bad ka State Reservation Policy sha ka Expert Committee kaba la thung da ka Sorkar hapoh ka jingïalam jong u Justice (Retd) MC Garg ryngkat bad u Justice (Retd) Dr. Satish Chandra, Prof DV Kumar, Prof Chander Shekhar, Prof Subhadip Mukherjee kum ki dkhot jong kane ka Committee.
Ka Expert Committee kan pule bniah ïa kane ka reservation policy, kaba la pyntreikam ha ka Jylla Meghalaya, bad ban ai jingmut lada donkam ban pynbeit kumjuh ruh ban ïathir jingmut bad baroh kiba ju ïadon bynta lang. Hadien nangta, ka Expert Committee lada ka sngewbit, ka lah ruh ban pynlong ïa ki jingïalang ha man la ki district jong ka Jylla bad kan sa pyntip ïa kane ha lane shuwa ka 15 tarik u Jylliew 2024 sha ka Sorkar Meghalaya halor baroh ki jingphylliew jingmut, jingai jingmut, ki jingpynsngew kaba ki ïoh na ki paidbah.
Namar kata, lada don mano-mano, ki ‘riewshimet, ne ki kynhun, kiba kwah ban ai jingmut ki lah ban phah ïa ki jingai jingmut jong ki sha ka Expert Committee halor ka Reservation Policy (ha ka ktien Phareng ne kano-kano ka ktien kren) ryngkat ka jaka sah, ki telephone number kiba pura, ban pyntip la ki dei na ka kynhun ‘riewlum ne kim dei satia, lane kiwei pat ki kynhun jaidbynriew.
Shuh shuh la ong ruh ba ki jingpynshisha la ka donkam ne kam donkam satia ban pynkylla ïa ka reservation policy, bad ban kyrshan ïa kata da ki kot kiba donkam lada ki don. Lada kita ki jingai jingmut lane ki jingpynsngew la dep ban phah mynshuwa, bad ki dei ban phah kopi lang.
Lada kita kiba ju ïadon bynta lang la ki dei shynrang ne kynthei ki la ïoh jingmyntoi ne kim ïoh jingmyntoi satia na ka bhah jong ka State Reservation Policy, bad ïa kine baroh, dei ban phah sha u LK Diengdoh Secretary, jong ka Expert Committee, da ka post ha ka address: Personnel & AR (B) Department, Room 513, Meghalaya Civil Secretariat (Main Building), Shillong, Pincode- 793001 lane lyngba ka email: [email protected].
Ka kyrwoh khubor ka ong ruh ba ïa ki tarik bad ka por ban pynlong ïa ka jingpynsngew paidbah, halor kane, yn sa pyntip sha baroh ha ka por kaba biang.
