Shillong, Jymmang 28
Ka jingjur slap hadien ka jingkhie ka ‘erïong ka la ktah bha ïa ka jingsam bording ilektrik ha kiba bun ki jaka bad ka jingshah ktah ka kham jur ha Rilum Garo namar tang ki transmission line kiba la julor ki don kumba 25 tylli nalor bun tylli ki transformer.
U Myntri ka tnat bording u AT Mondal u la ïathuh ha ka Sngi Ba-ar ba ka jingjur slap bad jingkhyrwit ka lyer ka la ktah bha khamtam ha Rilum Garo ha kaba ki dieng ki la khyllem bad ki siej ruh ki la noh ha ki waïar ilektrik bad kaba kham ktah bha ka dei ka jingduh ki transmission line kiba 33kv bad 11kv.
“Ki don 25 tylli tang ki transmission line kiba la shah ktah khamtam ha West Garo Hills bad South West Garo Hills district. Bun tylli ki transformer ruh ki la shah ktah,” la ïathuh u Mondal.
U la ong ba ki don ki transmission line kiba la dep ban pynbha bad treikam biang bad ki don kiba dang maramot.
U la ong ba ha East Garo Hills district ki don ki line kiba la treikam biang bad ka line na Nangal sha Rongkhon la dep ban pyntreikam biang katba ka line na Rongkhon sha Ampati ym pat dep ban pynbiang.
U Mondal u la ïathuh ruh ba la dep phah briew shuh sa kumba 80 ngut ban trei ïa ki kam maramot na ka bynta ban pynbha ïa ka jingsam bording kaba la thut bad shahktah.
U la ong ba ha Rilum Khasi ym da jur than ka jingshah ktah ki transmission line bad transformer hynrei ki don tang katto katne ki jingmaramot kiba donkam ban leh noh ban pynbiang ïa ka jingsam bording ilektrik.
La phah ruh ïa ki briew ban lum jingtip bad ai jingkheiñ ïa ki jingjulor bad jingdonkam ban maramot khnang ba ka jingsam bording kan long kaba biang.
Haba kylli halor ka jingpynïaid ïa ki cable bad waïar ilektrik na khrum, u Myntri u la ong, ban pynïaid napoh ïa ki cable ka dei tang ha ki jaka sor bad nongbah tangba ym pat lah ban leh.
