Shillong, Jymmang 28
Ka jingkhyrwit jong ka ‘erïong ‘Remal’ ha kine ki 3 sngi ba la dep ka la ïalam sha ka jingshah ktah jong palat spah ngut ki nongshong shnong bad ka jingjulor jong kiba bun tylli ki ïing ki sem hapoh ka Jylla.
Katkum ka kyrwoh na u Executive Director ka State Disaster Management Authority (SDMA), Meghalaya, ki don 134 ngut ki nongshong shnong bad 17 tylli ki shnong ha kylleng ka Jylla kiba la shah ktah nalor ka jingjulor jong kumba 29 tylli ki ïing bad 3 tylli ki jingtei.
Ka jinglong-jingman ka suiñ bneng namar ka ‘erïong ‘Remal’ ka la ïalam ruh sha ka jingkhlad noh jong uwei u nongshong shnong na East Jaiñtia Hills katba 4 ngut kiwei pat na East Khasi Hills ki la mynsaw.
Ha East Garo Hills, ka jingtied u pyrthat bad ‘lei-lieh ha Rongrong Bolsongchok, hapoh Songsak C&RD Block ha ka 26 tarik mynta u bnai ka la ïalam sha ka jingshah ktah jong 6 ngut ki nongshong shnong bad kawei ka shnong. Ki don ruh 2 tylli ki ïing kiba la julor na katei ka jingjia. Ha kajuh ka por, ka jingjur lyer ha ka 28 tarik ka la ïalam sha ka jingkhyllem ki dieng, ka jingdkut jong ki sainar bording bad ka jingjulor jong katto-katne ki ïing. Na ka liang ka tnad PWD, MePDCL ki la khmih bniah ïa ki kam.
Ha North Garo Hills, ka jingkhie ka ‘erïong ha Kharkutta Block ha ka 27 tarik ka la ktah ïa 125 ngut ki nongshong shnong bad 7 tylli ki shnong. Ha kane ka jingjia, 22 tylli ki ïing bad 1 ka skul ki la julor. Ha kajuh ka por, ka jingjur lyer ha ka 28 tarik ka la ïalam sha ka jingkhyllem ki dieng kiba la pynthut ïa ka leit ka wan ha ki surok, ka jingdkut jong ki sainar bording bad ka jingjulor jong katto-katne ki ïing. Na ka liang ka tnad PWD, MePDCL ki la khmih bniah ïa ki kam.
Haba phai sha Eastern West Khasi Hills, ka jingkhie ‘erïong ha Mawthadraishan Block ha ka 27 tarik mynta u bnai ka la ïalam sha ka jingshah ktah jong 3 ngut ki nongshong shnong bad kawei ka shnong. Ka don ruh kawei ka ïing kaba la julor. Ha kajuh ka por, ka jingkhie ‘erïong bad ka jingjur slap hapoh Mairang Block ha ka 28 tarik ka la ïalam sha ka jingjulor ki ‘post’ ding ilektrik namar ka jingkhyllem dieng. Ïa ka kam ban pynbha, la khmih da ka AEE, MePDCL, Mairang. Ka don ruh kawei ka ïing kaba la julor malu-mala bad kawei ka shnong kaba la shah ktah namar ka jingtwa khyndew ha Nongkhlaw, Mairang Block ha ka 28 tarik ïa kaba la khmih da ka shlem treikam BDO bad Gram Sevak.
Ha South West Khasi Hills, ka la don ka jingkhie ‘erïong ha ka shnong Mawten hapoh Mawkyrwat Block ha ka 28 tarik bad ha kane ka jingjia, kawei ka shnong ka la shah ktah bad kawei ka ïing ka la julor.
Ha East Khasi Hills, ka la don ka jingtwa khyndew ha Kench”s Trace hajan Rilbong Beat House ha ka 28 tarik ha kaba kawei ka shnong ka la shah ktah. Na ka liang ka Shillong Municipal Board bad MUDA ki la leit mih sha katei ka jaka. Ha kane kajuh ka sngi, ka la don ka jingtwa khyndew ha Mawlai Bypass, Mawlai Block bad ha kane ka jingjia, 4 ngut ki briew ki la mynsaw bad la pynkit noh ïa ki sha NEIGRIHMS.
Kumjuh, ka la don ka jingtwa khyndew ha surok Tyrsad hapoh Mawphlang Block ha ka 28 tarik ha kaba kawei ka surok ka la shah ktah. Na ka liang ka shlem treikam BDO bad PWD (Roads) ki la leh ïa kaba donkam ban pynkhuid ïa ka surok. Ha kane kajuh ka sngi ka la don ruh ka jingtwa khyndew ha Lower Lumparing ha kaba kawei ka ïing ka la julor.
Haba phai sha ka East Jaiñtia Hills, ka la don ka jingkhyllem jong kawei ka kynroh ha kawei ka ïing ha Sutnga Weilong hapoh Wapung C&RD Block ha ka 28 tarik. Ha kane ka jnigjia, kawei ka ïing ka la julor bad uwei u briew u la duh noh la ka jingim.
Ha South West Garo Hills, ka la don ka jingkhie ‘erïong kaba la ïalam sha ka jingjulor jong katto-katne ki ïing bad ‘post’ ding ilektrik ha ka 27 bad 28 tarik.
Ha South Garo Hills, la sakhi ïa ka jingkhyllem jong katto-katne ki dieng halor ki sainar bording ha Siju bad ka jingkhyllem jong uwei u ‘post’ ding ilektrik ha Chokpot. Kane ka la jia ha ka 28 tarik bad ym shym la don ïing ba julor. Ha kane kajuh ka sngi, ka la don ka jingjur lyer bad jinghap slap ha Baghmara.
Haba phai sha West Garo Hills, ha ka 28 tarik ka la don ka jinghap jong katto-katne ki dieng ha ki bynta jong ka Tura bad SE, shlem treikam T&T Circle MePTCL ha MeECL, Rongkhon Complex. Ka kam pynbha bad ka jingpynkhuid ïa ka surok ka dang ïaid.
Shuh shuh ha South West Khasi Hills, ka la don ka jingtwa khyndew ha ka 28 tarik mynta u bnai ha surok 13th KM MR kaba la ktah ïa 4 tylli ki shnong. Na ka liang ka PWD ka la pynkhuid ïa ka surok. Ha kajuh ka por, ka la don ka jingthut ha ka bording naduh ka 26 tarik.
Nalor kane, ka la don ka jinghap jong uwei u ‘post’ ding ilektrik ha ka shnong Khonjoy ha ka 28 tarik bad jingulor jong katto-katne ki ïing namar ka jingkhie ka ‘erïong.
