Shillong, Jymmang 29
Ka Anti Narcotic Task Force (ANTF) jong ka East Jaiñtia Hills ha ryngkat bad ki pulit pynïaid kali jong ka Khliehriat ki la ïoh ban kurup noh ïa ki kuli Yaba haduh 2000 tylli.
Kane ka jingïoh kurup ka la long hadien ba ka ANTF ka la ïoh ïa ka jingtip kaba bniah, ha kaba la kdew ba uwei u briew u la wan kit ïa u mar be-aiñ na Assam sha Shillong bad na ka liang ka ANTF ryngkat bad ki pulit pynïaid kali ka Khliehriat ki la pynlong ka jingtalasi kali ha Khliehriat.
Dei ha ka por 1 baje synñia la ïoh ban bat ïa kawei ka kali bad haba la pynlong ïa ka jingtalasi, la ïoh ban kurup ïa ki Yaba Tablets haduh 2000 tylli kiba don ka jingkhia kaba 191.88 gram na uwei u briew uba la tip kyrteng kum u Sumit Kumar Sinha ba la 39 snem uba na New Majai ha Bholaganj, East Khasi Hills.
Ki pulit ki la kurup noh ïa une u mar be-aiñ ryngkat bad ar tylli ki mobile phone na une u briew. Ha kaba ïadei bad kane, ki pulit ki la kem noh ïa ar ngut ki briew nalor u Sumit Kumar Sinha, la kem ruh ïa u Rabindra Deka, 27 snem na Khatarobori, Bhurbandha ha Marigaon, Assam. Ïa kine ki ar ngut la pynngat ha ki kyndon jong ka NDPS Act bad ka jingtohkit ka la ïaid shakhmat.
