Nongpoh, Jymmang:
Ka Ri Bhoi Youth Federation (RBYF) kaba la shakri mynta la 45 snem ha ka them Ri Bhoi naduh ba la seng ha u snem 1979, ka la rai ban plie paidbah noh ïa ka shlem treikam ba pura ha ka 7 tarik u Jylliew, 2024.
Ïa kane la pyntip da u President, Bah Bipul Thangkhiew haba kren sha ki lad pathai khubor ha ka Sngi Ba-ar, ha kaba u la ong naduh ba la seng ha u 1979, ka RBYF ka dang hap ban ai ka jingshakri na ka ïing shong wai.
U Bah Bipul u la ong ba ïa ka rai ban tei ïa ka shlem treikam ka seng la shem ha u snem 2004 bad ha kaba la ïoh ban thied ïa ka jaka ha utei hi snem hapoh ka jinglong nongïalam jong u Bah CL Masharing kum u President bad ha ka por u Bah BB Makdoh pat la sdang ban tih nongrim ban tei ïa kane ka shlem treikam.
U Bah Bipul u la ong ba kumba u Bah DD Lapang, uba dei u nongaibuit ba nyngkong eh (Founding Adviser) jong ka seng bad ba ïa ka seng la suit la shor nyngkong hapoh ka ïing sah ka jong u ha Jaïaw ha u snem 1979, ka seng ka kwah ba ka jingplie paidbah ïa kane ka shlem treikam ruh yn wan hi da u Bah DD Lapang.
