Shillong, Jymmang:
Ka Voice of the People Party (VPP) ka la kyntu ïa ka Sorkar ban bthah ïa baroh ki kolej hapoh ka Jylla ban pynrung klas ïa ki khynnah pule da kaba khmih ïa ki ‘mark’ ba ki ïoh pdiang ha ka klas XII khnang ba kin ïoh bteng ïa ka jingpule jong ki.
“Ka Sorkar ka la dei ban ai ka jingbthah sha ki kolej ha baroh kawei ka Jylla ba kin pynbiang lane ban pynrung klas ïa ki khynnah pule ha ki kolej da ka ‘mark’ ne ka ‘%’ kaba ki ïoh ha ka klas XII bad kane ka dei ban long na bynta baroh ki kolej,” la ong u dkhot ka Media Cell ka VPP, Dr. Rusievan Shangpliang hadien ka jingïakynduh bad u Myntri ka tnad pule-puthi ka Sorkar Jylla, u Rakkam A. Sangma ha ka Sngi Ba-ar.
U la ong ruh ba kane kan kynthup ïa kito ki khynnah kiba la dep thoh ïa ka CUET, kumjuh ïa kito kiba la duh ban ïakhun ïa katei ka eksamin khnang ba kin ym duh klas.
“Kumba ngi la pynpaw bad dawa hadien ba ngi la ïohi ïa ka huri-hura ha kane ka eksamin CUET jong ki UG kaba la long ha kine ki taïew ba la dep, ka seng ha ka Sngi Ba-ar ka la ïakynduh ïa u Myntri ka tnad pule-puthi ban pynsngew ha u ïa ki jingeh kiba ki khynnah pule (kiba la thoh bad bym ïoh thoh ïa ka CUET) ki ïakynduh,” la ong u Dr. Shangpliang.
Ha kajuh ka por, u la pynpaw ka jingsngewsih ban ïohi ba ka Sorkar Jylla haduh mynta kam pat shym la leh eiei halor katei ka bynta.
U la ong ruh ba ka seng ka la ïoh ban pynsngew ha u Myntri halor ki jingeh jong kito ki khynnah ki bym ïoh thoh ïa ka CUET bad ka jingrung klas jong ki ha ki kolej.
“Hooid ngi tip ba ki don ki kolej kiba la pynïaid shaid-shaid ïa ka ‘admission’ tangba bun ki kmie ki kpa bad ki khynnah ki dap dang ka jinglynga-jingpisa namar kim sngewthuh-sngewthaw ïa kata ka jingïaid jong ka ‘admission’ naba kiba bun na ki, kiba la duh ban leh ïa ka CUET – ka la buh ïa ki ha ka jingeh,” u la ong.
Shuh shuh haba pynsngew ba seng ka la pynshai ha u Myntri ba leh eiei noh kloi halor kane ka kam ba kyrkieh, u la bynrap, “U Myntri u la kular ban peit ïa kane ka kam bad ngi la ban jur ba un shim khia bad pynkloi noh ïa kaei kaba u dei ban leh.”
