Shillong, Jymmang 29
Ka jingwan jong ka ‘erïong ‘Remal’ ha ka jylla kaba la wanrah shibun ki jingjia na ka jinglynshop ka bor mariang, ka la pynlong ïa ki pulit ka tnat Home Guards & Civil Defence bad ka kynhun SDRF ban dang bun kam ban leit ïarap ïa kiba la shah ktah.
Ha ka kyrwoh khubor ba la pyllait da u Bah Paul H Shylla, Divisional Commandant of Home Guards, Shillong & u PRO jong ka Directorate of Civil Defence & Home Guards Meghalaya, Shillong u la pyntip ba ki Home Guards & Civil Defence ki la leit ban weng mardor ïa ki dieng kiba la khyllem ha ka shnong Pamrakrai, East Jaiñtia Hills bad ki la lah ban weng mardor ïa une u dieng ban pynthikna ba kan ym don than ka jingjulor ïa ka ïing bad ïa ka kali jong u Bah Welson Siangshai.
U la pyntip ruh ba ka Quick Response Team, kaba la don ha Khliehriat naduh ka 11 baje jong ka miet ba la dep, ka la ïoh pdiang ïa ka ‘phone call’ ha ka por 8 baje mynstep bad mar-mar ki la poi sha ka jaka ha ka por 9 baje bad ha kaba ki la lah ban ïarap ban pynthikna ba kan nym don shuh ka jingjulor jong ki jingdon jingem.
La ong ba ki Home Guard bad SDRF ki la leit ruh ban weng mardor ïa u dieng ba la khyllem uba la ban ïa ki sainar ilektrik ha ka shnong Tpeppale khnang ba kan ym pynthut ïa ka ïaid ka ïeng jong ki paidbah bad ki la ïatreilang ruh bad ka Meghalaya Energy Corporation Limited (MeECL) bad ka tnat Forest ban pyndep ïa ka kam khnang ba kan ym don ka jingthud ïa ka jngsam bording ilektrik.
Ka SDRF ka la shimkhia mardor ha kylleng ki jaka ban weng ïa ki dieng kiba la khyllem halor jong ki sainar ilektrik ha ka surok ban leit sha College of Community Science, Central Agricultural University, Sangsanggre, Tura, ban weng mardor ïa ki dieng kiba la khyllem halor jong ki post bad sainar ilektrik ha Matchakolgre, Tura bad kila leh ïa katei ka kam ha ka lynti kaba shngaiñ.
Shuh shuh u la pyntip ruh ba ki la leit ban ot bad ban pynkhyllem noh ïa uwei u dieng ba la jan khyllem bad la leh ïa katei khnang ba kan ym buh ha ka jingma ïa ki ïing kiba don marjan bad ïa ki nongshong shnong ka Babupara, Tura.
Ka SDRF mynta ka dang ïaid shakhmat ha ka ban weng noh ïa u dieng ba la khyllem ha Tura Civil Hospital bad ki la trei biang-biang ïa ka kam ban pynthikna ïa ka jingshngaiñ jong ki paidbah bad ïa kiba don hapoh jong ka hospital.
