Shillong, Jymmang 29
U President ka National People’s Party (NPP) ha Jylla, u Bah Prestone Tynsong u la ong ba ka jingkynnoh ba ka NPP ka dei ka BJP bad ka BJP ka dei ka NPP ka dei tang ha ka por ilekshon bad kane ka lut noh ha ka sngi thep ‘vote’ bad mynta ki briew ki wan sha ka Sorkar MDA khlem jingtieng ban kyrpad na ka bynta ki kam pynroi.
Kumta u la ong ba u ngeit skhem ba ki paidbah ki sngewthuh kham bha bad haba ki leit sha ki jaka thep ‘vote’ ki da pyrkhat bha namar kine ki jingkynnoh khamtam pyrshah ïa ka NPP kam pher wat lada ki don kiba kynnoh.
U Bah Prestone u la ong ba u don ka jingshaniah ba ki paidbah kin pynjop ïa ka NPP bad lada dei ba ki paidbah ki tieng shisha ïa kata ka jingkynnoh ba ka NPP ka dei ka BJP, kin nym wan shuh sha ka Sorkar ban pynsngew ïa ki jingdonkam ïa ki kam pynroi.
“Ngi sngew skhem bad don ka jingkyrmen ba ha kane ka kynti ka NPP kan jop na baroh ar tylli ki konstitwensi, na Shillong bad Tura. Kano-kano ka ilekshon kam dei kaba suk bad ym lah ban tip la ki nongthep ‘vote’ ki ‘vote’ shisha bad dei na kata ka daw ka long kaba eh,” u la ong.
Halor ka jingpyrkhing u Returning Officer ban nym shah ban ïaid paidbah ha ka sngi ñiew ‘vote’ ban kynhoi bad ïaid paidbah na bynta ka jingjop, u Bah Prestone u la ong ba ka kyndon 144 CrPC ka khang ban wan sha ki jaka ñiew ‘vote’ bad ban ïaid paidbah na jaka ñiew ‘vote’ sha kiwei ki jaka, hynrei kam khang pat ïano-ïano ban leit lehkmen sha ïing jong ki kyrtong ne kino-kino ki jaka, tangba ym ban ïaid paidbah (procession).
