Shillong, Jymmang 29
U Deputy Commissioner ka East Khasi Hills, u S.C. Sadhu ha ka Sngi Balang u la kren shai ba un ym weng satia ïa ka hukum ba la pynmih haba ïadei bad ka jingpynjari ïa ka kyndon 144 CrPC ha ka 4 tarik u Jylliew, kaba dei artad ka sngi ñiew ‘vote’ sha ka ilekshon Lok Sabha.
“Ngin ym weng ïa kane ka hukum. Kam don kano-kano ka jingpyrkhat ban weng noh ïa kane ka hukum kaba la dep pynmih, hynrei nga kwah ban, ban biang ba yn ym pyrshah ïa ki seng saiñ pyrthei, kyrtong ban ïaleh kmen ha la ki dong ki shnong jong ki,” la ong u Sadhu haba kren sha ki lad pathai khubor.
Haba ïadei bad katei ka bynta, u la ong ba u la ïoh pdiang jingthoh na kawei ka seng saiñ pyrthei bad kawei ka kynhun seng na bynta ban weng noh ïa ka kyndon 144 khamtam halor ka jingkhang ïa ka jingïaid paidbah.
“Ïa kane ka hukum la pynmih da ka jingthmu ban pyntikna ba kan ym don kano-kano ka jingthut ha ka shongsuk shongsaiñ, ha kajuh ka por ban pyntikna ïa ka jingïaid beit ïaid ryntih ha ka leit ka wan ki paidbah,” u la ong.
Haba kdew ba 4 tarik ka dei ka sngi long trei bad namarba ka jaka ñiew ‘vote’ ka don hapdeng sor, u DC u la ong ba ka lah ban long ba ka jingïaid paidbah ka lah ban ïalam sha ka jingthut ha ka shongsuk-shongsaiñ bad ka jingdheng kali kaba la mad ha ka ilekshon ba la dep sha ka ïingdorbar thawaiñ ka Jylla.
“Da kaba buh jingmut ïa kine, ngi la pynmih ïa kine ki jingbthah ban khang ïa ka jingïaid paidbah, hynrei ym ïa kiwei-kiwei ki jait lehkmen ha ki shnong ki thaw,” la ong u Sadhu.
Hashuwa, ka Voice of the People Party (VPP) lem bad ka Hynñiewtrep Integrated Territorial Organisation (HITO) ki la dawa na u DC ban khmih bniah, ha kajuh ka por ban weng noh ïa katei ka hukum kaba la pynmih ha ka 23 tarik mynta u bnai.
