Shillong, Jymmang 29
Ka jingaiti ïa ka jaka ban shna ïa ka surok Western Bypass ka la nang ïaid ha kaba palat 70% ka jaka la shimti ka National High-ways & Infrastructure Development Corporation Ltd (NHIDCL) na ka bynta kane ka projek kaba la mang kumba T. 640 klur ban shna surok bad `680 klur na ka bynta ka bai shim jaka.
Ki Deputy Commi-ssioner jong baroh ar tylli ki district ka East Khasi Hills district bad Ri-Bhoi district ki la dep ban aiti ïa ka jaka kumba 70 na ka 100 sha ka NHIDCL bad ki la pyllait ruh ïa ka pisa kaba dei ka bai shim jaka.
U Symbud Myntri Rangbah, Bah Prestone Tynsong uba peit ïa ka tnat shna surok, u la ïathuh ba ha u bnai ban wan (Jylliew), lehse ka jingaiti ïa ka jaka yn sa pyndep pura khnang ba yn lah ban sdang pyntrei noh ïa kane ka projek.
U la ong ba kawei na ki jingïateh hapdeng ka NHIDCL bad ka kompani kaba pyntrei ïa ka surok ka long ba kompani kan sa lah ban sdang pyntrei ynda la dep ban aiti ïa ka jaka 90 na ka 100.
Halor ki jingeh kiba mad ban pyntyllun ïa ka projek, u Bah Prestone u la ong ba ki jingeh kin mih beit haba pyntrei ïa ki projek khamtam namar ka rukom bat khyndew ha kane ka Jylla ha kaba ki ju don ruh kiba kam jaka markylliang wat hapdeng shi ïing tangba ka dei ka kamram ki bor district ban peit ïa kane.
U Bah Prestone u la ong ba donkam ban sngewthuh la ka dei ïa ka NHIDCL ne ïano-ïano ban sngewthuh ïa ka jingeh kaba don haba ïadei bad ka jaka puta ha kane ka Jylla namarba ki don kiwei ki projek ruh kiba la ïakynduh jingeh haba ïadei bad ka jaka.
Kumta u la ong ba kino kino ki ophisar ka NHIDCL ki dei ban ïakynduh ïa u namar ma u hi dalade u lum ka jingïalang man ka por tang na ka bynta ban ïakren shaphang ka jingshim jaka.
