Shillong, Jymmang 29
U Myntri Rangbah ka jylla, u Conrad K Sangma, u la ong ba ka jingwan jong ka ‘erïong ‘Remal’ hapoh ka jylla, ka la wanrah ki jingjulor bad ruh ka jingduh ïa ka mynsiem briew bad na ka liang ka sorkar ruh ka la lah ban ai jingïarap kaba kloi.
U Conrad u la ong ba ha ka jingther jong u ‘lapbah bad khyrwit ka ‘erïong, la don ki jingjulor ha ki katto katne ki jaka, ka jingduh mynsiem briew ha rilum Jaiñtia, na ka liang ka sorkar ka la ïoh ban ai jingïarap mar-mar.
U la ong ruh ba lada don kino-kino ki briew kiba dang mad jingeh na kane ka jinglynshop ka bor mariang, ki lah ban ïakren bad ki bor district lane ban ïakren lyngba ka CM Connect da kaba phone ha u 1971 ban ïoh leh ïa kaba donkam.
Shuh shuh u Conrad u la ong, hadien ka jinglynshop ka bor mariang, la sakhi ba ka la don ka jingtwa khyndew bad khyllem jong ki dieng, kaba la wanrah ruh ka jingeh bakhraw ha kaba ïadei bad ka jingduh bording ïa kaba na ka liang jong ki nongtrei ka MeECL ki la trei shitom ban pynbit pynbiang ïa ka bording ilektrik.
“Hooid ka long shisha ka jingeh kaba heh, hynrei na ka liang ka MeECL ka la lah ban ïaleh katba lah ban peit ba yn lah ban pynbiang ïa ka bording, wat la ym pat lah pura. Nga ai khublei ïa ki nongtrei ka MeECL kiba la trei shitom bad kumjuh ruh ïa ki nongtrei na ki tnat sorkar bapher bapher bad khamtam ïa ki bor pynïaid district kiba la lah ban pynkloi ïa ki lad jingïarap mar-mar,” la ong u Conrad.
