Shillong, Jymmang:
Hadien ka jingdon ka twa khyndew kaba kyndit-kynsan ha ka surok kaba don ha Mawkynroh Umshing kaba la jia ha ka step phyrngab jong ka Sngi Ba-ar ha ka por kumba 5 baje eiei ha kaba uwei u briew u la mynsaw bad lai ngut pat ki la mynsaw malu-mala.
Kine 4 ngut kiba la mynsaw ha kane ka jingtwa ka khyndew ki dei ki nongtrei bylla kiba sah harum jong katei ka jaka. Kine kiba mynsaw ki la ïathuh ruh ba katei ka khyndew ka la twa bad tuid sha ka jaka sah jong ki.
Halor kane ka jingjia, na ka liang u MLA ka Mawlai Constituency u la leit bak sha katei ka jaka ban jurip dalade ïa ka jinglong-jingman ha kaba u la pyntip ïa kane sha ka tnad jong ka Disaster Management, ki pulit bad ka tnad PWD.
Haba kren sha ki lad pathai khubor, u Bah Brightstarwell Marbaniang, u la ong ba mar sien ïoh jingtip na u Rangbah Shnong ka Mawkynroh Umshing halor katei ka jingjia u la wan mih sha katei ka jaka bad pyntip mardor ïa ki bor ba dei khmih namar lada kam don ka jingshim khia halor katei ka jingtwa ka khyndew kan sa poi sha kaba kham don jingma kaba lah ban wanrah ruh ïa ka jingjia kaba sngewsih hadien habud.
Na ka liang u Rangbah Shnong ka Mawkynroh Umshing, Bah L. Nongkhlaw, u la ïathuh ba na ka liang ka Dorbar Shnong bad ki pulit ki la wan mih sha katei ka jaka mar sien ïoh jingtip halor kane.
U Bah Brightstarwell u la ong ba ka dawbah ka jingtwa katei ka khyndew ka dei namar ka jingset ïa ka um bad ba kam don satia ka nala kaba ka um dei ban ïaid lynti ba la tei da ka tnad PWD bad kane ka buh jingma shikatdei eh ïa ki nongshong shnong.
“Ngi ngeit skhem ba lada ki wan ki nongtrei jong ka PWD, ki dei kita kiei-kiei kiba ngin sa batai ïa ki namar lada u slap un dang ïai bteng kumne na ka bynta ka 2-3 sngi, kane ka mut kan buh jingma hangne “, la ong u Bah Brightstarwell
U Bah Nongkhlaw u la ïathuh ba kitei 4 ngut ki nongbylla ki la mynsaw namar ka jingshah lymbub ha ka khyndew kaba twa nalor hynrei da ka jingkloi mih jong kitei ki 4 ngut na katei ka ïing kaba ki sah ki la lait na kano-kano ka jingjia kaba sngewsih bad ki la shu mynsaw malu-mala bad ïa kiba mynsaw ruh la pynkit noh sha ka jaka ai jingsumar.
U Bah Nongkhlaw u la ong ba katei ka jingtwa khyndew ka dei na ka jaka shimet jong ki briew bad kam pat don satia kano-kano ka jingtwa khyndew, hynrei kane ka jingtwa khyndew ha katei ka jaka ka dei ha ka sien kaba nyngkong.
