Jowai, Jymmang 29
Hapdeng ka jingther jong u ‘lapbah ‘lapsan, ka lyer kaba jur, ki dkhot jong ka Khooid Yaka Wah Myndtu bad ki katto-katne ngut ki nongshong shnong ka Jowai ha ka 29 tarik Jymmang ki la mih paidbah hakhmat ka ophis u DC ban ud ban nam ïa ka High Court jong ka Jylla bad ka Meghalaya Human Rights Commission ban pyllait im ïa ka Wah Myntdu na ka jingshah pynjulor ha kti jong ka Dhar Construction bad ka tnat PWD.
Ha kane jingmih paid -bah nalor ka jingrah ïa ki placard kiba thoh ïa ki kyntien ban dawa pynkhuid ïa u shyiap bad khyndew ba tuid sha ka wah Myntdu, la don ruh ki kyntien kiba thoh “MS Dhar Construction Company ka dei ban shah pynshitom katkum ki kyndon aiñ namar ka pynïap ïa ka wah Myntdu kaba dei ka tyllong sam umbam umdih kaba kongsan tam jong ki paidbah.
Haba kren sha ki lad pathai khubor, u nongïalam jong ka Khooid Yaka Wah Myntdu u Bah Khroo L Pariat u la ong ka surok thymmai Jowai Bypass na Khliehtyrshi sha Treiongriang ba pyntrei da ka Dhar Construction Company kala pynjulor ïa ka wah Myntdu na ka jingtuid jong ka khyndew sha ka wah khamtam ha ka por slap.
Ha ki snem kiba la dep kumjuh ha kine ki sngi kiba mynta, ka Myndtu ka la kylla um ktieh bad kane ka um ktieh kala rung shapoh ki thliew ïing jong ki nongshong shnong ka Jowai kiba shaniah umbam umdih na ka, la ong u Bah Pariat.
Shuh shuh ha kaba ïadei bad ka jingpynjari da ka kyndon 144 CrPC ha Wah Myntdu, u Pariat u la ong, kam dei shuh kaba thymmai, kane kajuh ka kyndon la pynjari ha u snem 2021 ha ka por ba pynheh ïa ka surok Jowai-Amlarem.
U la buh jingkylli ruh ïa u DC kumjuh ïa ka tnat PWD halor ka jingbym pynshitom ïa u kontraktor ne ïa kiba donkti ban pynktieh ïa ka wah Myntdu.
U la kyntu ruh ïa u Myntri Rangbah ka Jylla u Conrad K Sangma uba ju kren ban ïada ïa ki tyllong um tyllong wah ban phai khmat sha ka Myntdu bad kiwei ki um ki wah ka rilum Jaiñtia.
Ha kaba ïadei bad ka jingpyntrei ïa ka surok Jowai Bypass, u Bah Pariat u la ong kane ka surok kam dei kaba da donkam eh hynrei ka dei tang ban pynjulor.
U la pynpaw ruh ka jinglyngngoh ba ka Ministry jong ka Road and Highway jong ka sorkar India ka ailad ban shna ïa kane ka surok tang 20 mitar na ka wah Myntdu bad ailad ruh ban bret ïa ka khyndew ha ka wah Myntdu.
