Shillong, Jymmang 29
Ka Voice of the People Party (VPP) ha ka Sngi Balang ka la kyntu ïa ki nongkyrshan ka seng ban ïa mih paidbah beit ha ka 4 tarik u Jylliew, kaba dei ka sngi ñiew ‘vote’ sha ka ilekshon Lok Sabha bad ban ym pynsngap ïa ki hukum kiba pyrshang ban khang lad ïa ka jinglehkmen jong ki.
“Ka seng ka la dep ban ai jingthoh sha u Deputy Commissioner (DC) bad ngi ïeng ha ka nongrim ba ngim lah ban pdiang bad ngin mih beit kum ki paidbah nongkyrshan ka VPP ban leit sha ka jaka ñiew ‘vote’,” la ong u President ka VPP, Bah Ardent M. Basaïawmoit.
U la ong ruh ba kumba ka seng ka khmih lynti ban ïoh ïa ka jingjop ha ka ilekshon MP lyngba ka jingkyrshan ba shit rhem jong u paidbah, ha kajuh ka por, u la kyrpad ïa ki paidbah ban ïashad kmen da ka akor ka burom bad ka jingtipbriew-jingtipblei.
Hashuwa, ka seng ka la phah jingthoh sha u DC ka East Khasi Hills ban pynpaw ïa ka jingbym pdiang halor ka jingpynjari kyndon 144 CrPC ha ka 4 tarik u Jylliew, kaba long ruh ka sngi ñiew ‘vote’.
“Ngi khmih lynti ba hadien ka jingthoh ba la ai sha u, u DC un shimkhia bad weng noh ïa kane ka hukum, hynrei ka long kaba sngewsih ban ïohi ba u DC u la pynpaw ba um lah ban weng ïa ka hukum da kaba ai daw ïa ka jingkhapngiah, jingdheng kali bad ba ïoh mih kano-kano ka kynrum-kynram,” la ong u Bah Basaïawmoit.
Haba pynsngew ba ka long kaba thamula bad ba khyllah ba ki bor pynïaid ki sngewkhia ïa ka dheng kali tang ha ka 4 tarik Jylliew, u la ong ba ki paidbah ka Jylla khamtam ha nongbah Shillong ki mad ïa ka jingdheng kali kaba man ka sngi namar ka jingbym lah ki bor pynïaid ban pynïaid beit ïaid ryntih haba ïadei bad kane ka liang.
“Ban ong ba kan mih kano-kano ka kynrum-kynram, ka long tang ka jingpyrshang ban da rapjot ïa ka jingthmu kaba rieh jong ki, kaba tang ma ki, kiba tip, kaei ka daw kaba pynlong ïa ki ba kin pynmih ïa kane ka hukum,” la ong u President.
Ha kajuh ka por, u la kyntu ïa ki paidbah ba kim dei ban pynsngap satia ïa kiba kum kitei ki hukum kiba pyrshang tang ban khang lad ïa ka jinglehkmen jong ki kum ki paidbah kiba la dep ai ka jingkyrshan ha kane ka ilekshon MP kaba la dep.
Haba pynrem jur ïa kiba kum kitei ki hukum kiba pyrshang ban ïuh-roit ïa ka hok u paidbah ha ka ri synshar paidbah, u Bah Basaïawmoit u la ong ba Meghalaya kam dei ka Jylla kum kiwei pat kiba don ka jingïaumsnam ne ki jingïakulmar wat ha ki por ilekshon.
“Kam pat ju kham jia koit ban ong ba ngi la ïohsngew ban don ka jingkulmar ka ban mih hadien ka jingpynbna ïa ka risol ha ki ilekshon kiba bun,” u la ong.
Shuh shuh u la bynrap, “Kum ka seng ngin ïaid shakhmat bad ngin mih ban leit sngap bad yn ym don mano-mano ba lah ban khang lad ïa ka jingmih paidbah jong ngi namar ka jingmih jong ngi ka long ba ngi kwah ban tip hadien ba ngi la pyndonkam ïa ka hok jong ngi ban thep ‘vote’, mano ba jop, bad ban ïoh ruh ban lehkmen ha kata ka jingjop kaba ngi khmih lynti kum ka seng.”
